خلفائے رسول ص شخصیت،حالات زندگی،عہد خلافت

۹:… ابو عماری عبد خیر بن یزید ۱۰:… عبدالرحمن بن ابی لیلیٰ ۱۱:… عبیدۃ السلمانی ۱۲:… ابو العالیہ عبداللہ بن سلمہ المرادی الکوفی ۱۳:… عبداللہ بن شقیق العقیلی ۱۴:… علقمہ بن قیس النخعی ۱۵:… ابویحیٰی عمیر بن سعید النخعی الصہبانی الکوفی ۱۶:… ہانی بن ہانی الہمدانی الکوفی ۱۷:… یزید بن شریک بن طارق التیمی الکوفی (۵)… ہجرت مدینہ سے غزوۂ احزاب تک سیّدنا علی رضی اللہ عنہ کے اہم کارنامے رسول اللہ اکرم صلی اللہ علیہ وسلم جب مدینہ پہنچ گئے اور استقرار و اطمینان کی سانس لی تو اس کے بعد اسلامی مملکت کی بنیادیں استوار کرنے کی تیاری کرنے لگے، چنانچہ مہاجرین وانصار کے درمیان مؤاخاۃ (بھائی چارگی) قائم کی، پھر مسجد کی بنیاد رکھی، پڑوس کے یہودیوں سے امن کا معاہدہ کیا، قرب و جواب میں سرایا اور خفیہ دستے بھیجنے لگے، اورایک نئے معاشرے کی اقتصادی، تعلیمی اور تربیتی تعمیر و ترقی میں لگ گئے، اورعلی رضی اللہ عنہ آپ کے ساتھ رہے، آپ کے احکامات کو عملی جامہ پہناتے اور آپ کی ہدایت رہنمائی پر عمل کرتے رہے۔ ۱۔ مدینہ میں مؤاخاۃ (بھائی چارہ): رسول اکرم صلی اللہ علیہ وسلم نے علی بن ابی طالب اور سہل بن حنیف رضی اللہ عنہما کے درمیان مؤاخاۃ کا رشتہ قائم کیا۔[1] اس ضمن میں بعض علما نے یہ بحث چھیڑی ہے کہ کیا مکہ میں بھی ان مہاجرین کے درمیان کوئی مؤاخاۃ قائم ہوئی تھی، چنانچہ بلاذری نے اشارہ کیا ہے کہ رسول اللہ صلی اللہ علیہ وسلم نے ہجرت سے پہلے مکہ میں راہ حق میں مرمٹنے کے جذبہ کو پروان چڑھانے اور ایک دوسرے کی غمخواری کے لیے مسلمانوں میں باہمی مؤاخاۃ کا تعلق قائم کیا تھا، چنانچہ سیّدنا حمزہ اور زید بن حارثہ رضی اللہ عنہما کے درمیان، ابوبکر اور عمر رضی اللہ عنہما کے درمیان، عثمان بن عفان اور عبدالرحمن بن عوف رضی اللہ عنہما کے درمیان، زبیر بن عوام اور عبداللہ بن مسعود رضی اللہ عنہما کے درمیان، عبیدہ بن حارث اور بلال حبشی رضی اللہ عنہما کے درمیان، مصعب بن عمیر اور سعد بن ابی وقاص رضی اللہ عنہما کے درمیان، ابوعبیدہ بن جراح اور سالم مولیٰ ابوحذیفہ رضی اللہ عنہما کے درمیان، سعید بن زید بن عمرو بن نفیل اور طلحہ بن عبید اللہ رضی اللہ عنہما کے درمیان اور اپنے اور علی بن ابی طالب رضی اللہ عنہ کے درمیان مؤاخاہ قائم کی تھی۔[2]

[1] الکاشف للذہبی(۳؍۲۱۸)۔ [2] انساب الأشراف (۱؍۲۷۰)۔