خلفائے رسول ص شخصیت،حالات زندگی،عہد خلافت

(۲)…عثمان رضی اللہ عنہ اور قرآن سیّدنا عثمان رضی اللہ عنہ نے قرآن کے ساتھ اپنا تعلق مضبوط کیا۔ چنانچہ ابو عبدالرحمن السلمی بیان کرتے ہیں کہ انہوں نے کس طرح رسول اللہ صلی اللہ علیہ وسلم سے قرآن سیکھا تھا۔ آپ کے ایسے اقوال ہیں جو قرآن کے ساتھ والہانہ محبت پر دلالت کرتے ہیں ۔ ابوعبدالرحمن السلمی سے روایت ہے: ہمیں جو لوگ قرآن پڑھاتے تھے جیسے عثمان بن عفان اور عبداللہ بن مسعود رضی اللہ عنہما وغیرہم یہ حضرات جب رسول اللہ صلی اللہ علیہ وسلم سے دس آیتیں سیکھ لیتے تو اس وقت تک آگے نہیں بڑھتے تھے جب تک ان میں جو علم و عمل ہے اس کو سیکھ نہ لیں ۔ ان کا کہنا ہے کہ ہم نے قرآن اور علم و عمل سب ایک ساتھ سیکھا ہے اسی لیے سورت کو حفظ کرنے میں ایک مدت لگ جاتی تھی۔[1] اور یہ طرز عمل اس لیے اختیار کیا گیا تھا کیونکہ اللہ تعالیٰ کا ارشاد ہے: ﴿ وَالَّذِينَ هَاجَرُوا فِي اللَّـهِ مِن بَعْدِ مَا ظُلِمُوا لَنُبَوِّئَنَّهُمْ فِي الدُّنْيَا حَسَنَةً ۖ وَلَأَجْرُ الْآخِرَةِ أَكْبَرُ ۚ لَوْ كَانُوا يَعْلَمُونَ ﴾ (ص: ۲۹) ’’یہ بابرکت کتاب ہے جسے ہم نے آپ کی طرف اس لیے نازل فرمایا ہے کہ لوگ اس کی آیتوں پر غور و فکر کریں اور عقل مند اس سے نصیحت حاصل کریں ۔‘‘ عثمان رضی اللہ عنہ نے رسول اللہ صلی اللہ علیہ وسلم سے آپ کا یہ ارشاد روایت کیا ہے: ((خیر کم من تعلم القرآن وعلمہ۔))[2] ’’تم میں سب سے بہتر وہ ہیں جو قرآن سیکھیں اور قرآن سکھائیں ۔‘‘ آپ نے قرآن کریم کو مکمل رسول اللہ صلی اللہ علیہ وسلم سے پڑھا، آپ کے مشہور تلامذہ میں سے ابوعبدالرحمن السلمی، مغیرہ بن ابی شہاب، ابوالاسود، زر بن حبیش ہیں ۔[3] تاریخ نے قرآن کریم سے متعلق عثمان رضی اللہ عنہ کے بعض اقوال کو محفوظ کر رکھا ہے، مثال کے طور پر آپ فرماتے ہیں : ٭ اگر ہمارے دل پاک ہوں تو اللہ کے کلام سے آسودہ نہیں ہو سکتے۔[4] ٭ یقینا میں اس بات کو ناپسند کرتا ہوں کہ کوئی یوں ہی دن گزر جائے اور میں قرآن کریم کو نہ دیکھوں ۔[5] ٭ مجھے دنیا کی تین چیزیں محبوب ہیں : بھوکوں کو آسودہ کرنا، ننگوں کو کپڑے پہنانا اور قرآن کی تلاوت کرنا۔[6]

[1] الفتاوی: (۱۳؍۱۷۷) [2] البخاری: فضائل القرآن صفحہ (۵۰۲۷) [3] تاریخ الاسلام، عہد الخلفاء الراشدین؍ الذہبی صفحہ (۴۶۷) [4] الفتاوی: ۱۱؍۱۲۲۔ البدایۃ والنہایۃ: ۷؍۲۲۵۔ [5] البدایۃ والنہایۃ: ۷؍۲۲۵۔ فرائد الکلام صفحہ: ۲۷۵۔ [6] ارشاد العباد الاستعداد لیوم المعاد صفحہ: ۸۸۔