خلفائے رسول ص شخصیت،حالات زندگی،عہد خلافت

چنانچہ عمر رضی اللہ عنہ نے اسے وقف کردیا۔ آپ کا یہ صدقہ اللہ کے راستہ میں ، گردن آزاد کرانے میں ، مسکینوں ، مہمانوں ، مسافروں اور قرابت داروں میں خرچ ہوتا رہا۔ جو اس کا نگراں ہو اس کے لیے اس میں سے معروف طریقہ سے کھانے یا اپنے دوست کو کھلانے میں کوئی حرج نہیں بشرطیکہ اسے مال دار بنانا مقصود نہ ہو۔ [1] ایک روایت میں ہے کہ عمر رضی اللہ عنہ کو خیبر میں ایک زمین حاصل ہوئی، وہ نبی کریم صلی اللہ علیہ وسلم کی خدمت میں حاضر ہوئے اور عرض کی: مجھے زمین حاصل ہوئی ہے، اس سے بہتر مال مجھے کبھی نہیں ملا ، اس سلسلہ میں آپ مجھے کیا حکم فرماتے ہیں ؟ نبی صلی اللہ علیہ وسلم نے ارشاد فرمایا: (( إِنْ شِئْتَ جَسَسْتَ أَصْلَہَا وَتَصَدَّقْتَ بِہَا۔)) ’’اگر تم چاہو تو اس کے اصل (زمین) کو روک لو اور اس (پھل وغیرہ) کو صدقہ کردو۔‘‘ چنانچہ عمر رضی اللہ عنہ نے اس کو وقف کردیا اور فرمایا: اس کے اصل کو فروخت نہ کیا جائے گا، نہ ہبہ کیا جائے گا اور نہ اس کا وارث بنایا جائے گا، وہ فقراء، قرابت داروں ، غلاموں کی آزادی اور اللہ کے راستہ میں مہمانوں اور مسافروں کے لیے ہے۔ جو اس کا نگراں ہو اس کا معروف طریقے سے اس میں سے کھانا یا اپنے دوست کو کھلانا جائز ہے بشرطیکہ اسے مال دار بنانا مقصود نہ ہو۔‘‘[2] یہ ہے عمر فاروق رضی اللہ عنہ کا وہ شاندار مؤقف جس میں آپ کی فضیلت، بھلائی وخیر کے کاموں میں آگے بڑھ نکلنے کی شدید خواہش اور اخروی زندگی پر دنیا کی فانی زندگی کو قربان کردینے کی پوری کوشش نمایاں ہے۔ ۱۰۔ عمر بن خطاب رضی اللہ عنہ اور ان کے بیٹے کو تحفہ نبوی : ابن عمر رضی اللہ عنہما سے روایت ہے کہ عمر رضی اللہ عنہ نے ایک آدمی کو ریشم کا ایک جوڑا پہنے دیکھا، آپ اس جوڑے کو لے کر نبی صلی اللہ علیہ وسلم کے پاس آئے اور کہا: اے اللہ کے رسول! آپ اسے خرید لیں اور وفود کے استقبال کے وقت اسے پہن لیا کریں ۔ آپ صلی اللہ علیہ وسلم نے ارشاد فرمایا: (( إِنَّمَا یَلْبَسُ ہٰذہِ مَنْ لَا خَلَاقَ لَہٗ فِی الْآخِرَۃِ۔))…’’ریشم کا کپڑا وہ پہنتا ہے جس کا آخرت میں کوئی حصہ نہیں …‘‘ پھر کچھ وقت گزرنے کے بعد … آپ صلی اللہ علیہ وسلم نے آپ کے پاس ایک جوڑا ہدیہ بھیجا، آپ اسے لے کر نبی صلی اللہ علیہ وسلم کے پاس آئے اور کہا: آپ نے مجھے یہ جوڑا بھیجا ہے، حالانکہ آپ نے اس جیسے جوڑے، یا تمیمی کے جوڑے کے بارے میں دوسری بات کہی تھی۔ آپ صلی اللہ علیہ وسلم نے فرمایا: میں نے اسے اس لیے بھیجا ہے تاکہ تم اس کے ذریعہ سے (بیچ کر) مال کمالو۔ آپ نے وہ جوڑا اپنے ایک بھائی کو دے دیا جو مکہ میں تھا اور اسلام نہیں لایا تھا۔ [3]

[1] صحیح البخاری، کتاب الوصایا، حدیث نمبر: ۲۷۶۴۔ [2] صحیح البخاری، الوصایا، حدیث نمبر: ۲۷۳۷۔ [3] صحیح مسلم، حدیث نمبر: ۲۰۶۸