خواتین کے مخصوص مسائل کتاب و سنت کی روشنی میں

﴿وَإِذَا سَأَلْتُمُوْھُنَّ متَاعًا فَسْأَلُوْھُنَّ مِنْ وَّرَائِ حِجَابٍ ﴾ (الاحزاب:۵۳) ’’ جب تم نبی صلی اللہ علیہ وسلم کی بیویوں سے کوئی چیز طلب کرو تو پردے کے پیچھے سے طلب کرو۔ ‘‘ مذکورہ آیت میں حجاب سے مراد ایسی دیوار ،دروازہ یا لباس ہے جو عورت کو پردے میں رکھے۔ آیت اگرچہ ازواجِ مطہرات کے حق میں نازل ہوئی ہے، لیکن اس کا حکم تمام مومنات کو عام ہے، کیونکہ اللہ تعالیٰ اس کی علت بیان کرتے ہوئے ارشاد فرماتا ہے: ﴿ذٰلِکُمْ أَطْھَرُ لِقُلُوْبِکُمْ وَقُلُوْبِھِنَّ ﴾ (الاحزاب:۵۳) ’’ تمہارے اور ان کے دلوں کے لیے کامل پاکیزگی یہی ہے۔ ‘‘ یہ ایک علت ہے، لہٰذا علت کا عموم حکم کے عموم کی دلیل ہے۔ ارشادِ ربانی ہے: ﴿یٰٓـاَیُّھَا النَّبِیُّ قُلْ لِّاَزْوَاجِکَ وَبَنٰتِکَ وَنِسَآئِ الْمُؤْمِنِیْنَ یُدْنِیْنَ عَلَیْھِنَّ مِنْ جَلَابِیْبِھِنَّ ﴾ (الاحزاب:۵۹) ’’ اے نبی ( صلی اللہ علیہ وسلم )! اپنی بیویوں سے اور اپنی صاحبزادیوں سے اور مسلمان عورتوں سے کہہ دو کہ وہ اپنے اوپر اپنی چادریں ڈال لیا کریں ۔ ‘‘ شیخ الاسلام ابن تیمیہ رحمہ اللہ مجموع الفتاویٰ (۲۲/ ۱۱۰، ۱۱۱) میں رقم طراز ہیں : ’’ مذکورہ آیت کریمہ میں وارد لفظ جلباب کے معنی ہیں دوہری چادر جس کو سیّدنا ابن مسعود رضی اللہ عنہ اور دیگر علم رداء (چادر) اور عوام ازار کہتے ہیں ۔ حقیقتاً جلباب اس بڑی چادر کو کہتے ہیں جو سر سمیت عورت کے پورے بدن کو دھانپ لے۔ سیّدنا ابو عبیدہ وغیرہ کا بیان ہے کہ اسے اپنے سر کے اوپر سے اس طرح ڈال لے گی کہ سوائے آنکھ کے جسم کا کوئی حصہ ظاہر نہ ہو،