ختم نبوت - صفحہ 229

یہ استدلال بھی تحریف قرآن ہے، فرمان باری تعالیٰ ہے : ﴿وَلَمَّا جَآئَ ہُمْ کِتَابٌ مِّنْ عِنْدِ اللّٰہِ مُصَدِّقٌ لِّمَا مَعَہُم﴾ (البقرۃ : 89) ’’جب ان کے پاس اللہ کی طرف سے ایسی کتاب آگئی، جو ان کی کتب کی تصدیق کرتی ہے۔‘‘ تو کیا آخری کتاب سے مراد بھی مصدق الکتب ہو گا؟ اور اس کے بعد نزول کتب کا سلسلہ جاری سمجھا جائے گا؟ جو لوگ خاتم الانبیا کا معنی مصدق الانبیا بتلا کر نبوت کے جاری ہونے کے قائل ہیں ، قرآن کو وہ بھی آخری مانتے ہیں ۔ ان آیات کا معنی یہ ہے کہ رسول اللہ صلی اللہ علیہ وسلم نے پہلے تمام انبیا کی تصدیق کردی، اسی طرح قرآن نے پہلی تمام کتب کی تصدیق کردی ۔ پہلے انبیائے کرام علیہم السلام کی تصدیق کے بعد قرآن کریم نے خبر دی کہ آئندہ کوئی نبی نہیں آئے گا۔ لہٰذا اس آیت کریمہ سے ثابت ہوتا ہے کہ نبی کریم صلی اللہ علیہ وسلم آخری نبی ہیں ۔ آپ صلی اللہ علیہ وسلم کے بعد کوئی نبی نہیں ۔ 9. فرمان باری تعالیٰ ہے : ﴿ہُوَ الَّذِي بَعَثَ فِي الْـأُمِّیِّینَ رَسُولًا مِّنْہُمْ یَتْلُو عَلَیْہِمْ آیَاتِہٖ وَیُزَکِّیہِمْ وَیُعَلِّمُہُمُ الْکِتَابَ وَالْحِکْمَۃَ وَإِنْ کَانُوا مِنْ قَبْلُ لَفِي ضَلَالٍ مُّبِینٍ، وَآخَرِینَ مِنْہُمْ لَمَّا یَلْحَقُوا بِہِمْ﴾ (الجُمُعۃ : 2۔3) ’’وہ اللہ، جس نے امیوں اور ان کے بعد والوں میں ایک رسول کی بعثت فرمائی، رسول ان پر اللہ کی آیات کی تلاوت کرتا ہے، ان کا تزکیہ کرتا ہے اور انہیں علم وحکمت کی تعلیم دیتا ہے، یقینا اس سے پہلے یہ لوگ واضح گمراہی میں تھے۔‘‘