کتاب: اسلام ہی ہمارا انتخاب کیوں ؟ - صفحہ 81
اسلام کے بارے میں اسلام قبول کرنے والوں کے مختصر خیالات اسلام روز مرہ کی زندگی میں انسانوں کی رہنمائی کرتا ہے میں یہ کہنا چاہوں گا کہ جہاں اسلام انسان کی روز مرہ زندگی کے لیے رہنمائی کرتا ہے وہاں آج کی نام نہاد عیسائیت نظریاتی طور پر بالواسطہ اور عملی اعتبار سے اجتماعاً اپنے پیروکاروں کو یہ سکھاتی ہے کہ اتوار کے دن اﷲ کی عبادت کریں اور ہفتے کے باقی دن انسانوں پر ظلم توڑتے رہیں ۔[1] [سر عبداﷲ آرچیبالڈ۔ ہیملٹن، سسیکس، برطانیہ] (Sir Abdullah Archibald-Hamilton, Sussex, U.K) مجھے اسلام ہی مطلوب تھا میں یہ دیکھ کر اسلام کی طرف متوجہ ہوا کہ یہی وہ سچا دین ہے جو امن وسکو ن مہیا کرسکتا ہے۔ اسلام سے متعارف ہونے سے قبل میں نے ہر مذہب کی کتابیں پڑھیں اور پھر اسلام کا مطالعہ شروع کیا، تو جتنا پڑھتا چلا گیا اتنا زیادہ یہ احساس دل میں راسخ ہوتا گیا کہ جو کچھ میں تلاش کر رہا تھا وہ کسی اور جگہ نہیں بلکہ یقینی طور پر مجھے یہیں مل گیا ہے۔ یہ فیصلہ کرنے کے بعد کہ اسلام ہی میرا مطلوب ہے، میں نے یہ محسوس کیا کہ مجھے کوئی ایسا آدمی مل جائے جس سے میں مشورہ کرسکوں اور رہنمائی لے سکوں ۔ اب یہ میری ذمہ داری ہے [1] ۔ اسلامک ریویو، فروری1924ء،ج:12،ش:2،ص:77