علم حدیث میں اسناد و متن کی تحقیق کے اصول محدثین اور فقہاء کے طرز عمل کی روشنی میں

اعتراض حضرت ابو ہریرہ رضی اللہ عنہ کی روایت پر حضرت عائشہ صدیقہ رضی اللہ عنہا کے اِستدراک سے اعتراض کا پہلو یہ نکلتا ہے کہ جب ان کے سامنے ایک ایسی روایت بیان کی گئی جو اپنے مضمون کے اعتبار سے دوسری صریح روایت کے خلاف تھی تو انہوں نے اس حدیث کو یہ کہتے ہوئے رد فرمادیا کہ جب ایک عام مسلمان پر دن اور رات میں پانچ نمازیں فرض کی گئی ہیں اور ان میں وترکی فرضیت کا تذکرہ نہیں آتا تو یہ کیونکر ممکن ہے کہ ایک شخص کی جملہ فرضی عبادات صرف اس وجہ سے اللہ تعالیٰ کے بارگاہ میں ناقابل قبول قرار پائیں کہ اس نے غیر فرضی نماز کو ادا کرنے میں سستی کا مظاہرہ کیا ہے۔ معترضین کا محل استدلال یہ ہے کہ اس واقعہ سے یہ ثابت ہوتا ہے کہ کسی بھی واقعہ کو نقدروایت میں درایتی نقد کی بنیاد پر رد کردینا چاہیے، خواہ یہ حدیث روایۃ صحیح ہی کیوں نہ ہو۔ جواب حدیث پر اعتراض کرنے والوں کا زیادہ تر انحصار چونکہ عقل پر ہوتا ہے اور وہ تحقیق میں اترنے سے گریز اختیار کرتے ہیں اور تعارض روایات پیش کرنے میں بڑی چا بک دستی اور سرعت بیانی کے جوہر دیکھاتے ہیں اور انہیں اس بات سے کوئی سرو کار نہیں ہوتا کہ حدیث کا پایہ معیار اصول ِروایت کی رو سے کس قسم کا ہے؟ یہی وجہ ہے کہ اگر کوئی حدیث روایۃً صحیح بھی ہو تو ان کے مقرر کردہ اصول ِدرایت کی بنا پر ضعیف قرار پا سکتی ہے۔ درج بالا روایت میں بھی انہوں نے تحقیق سند کے معیار کو ملحوظ نہیں رکھا اور جھٹ سے اپنے درایتی اصول کی بنیاد پر تعارض ِاحادیث کا ڈھنڈورا پیٹا ہے، حالانکہ اصول تحقیق کی روشنی میں اگر اس روایت کو پرکھا جائے تو یہ روایت رسول اللہ صلی اللہ علیہ وسلم سے صحت کے ساتھ ثابت نہیں ہوسکی۔ مناسب معلوم ہوتا ہے کہ ہم آئمہ جرح وتعدیل کے اقوال کی روشنی میں اس سند کے رواۃ کے احوال جائزہ یہاں پیش کردیں ۔ روایت مذکورہ کی اسنادی حیثیت ’اہل درایت‘ نے جس روایت کو اپنے دعوائے درایت کے اثبات کے لیے بنیاد بنایاہے وہ روایت ہی صحیح نہیں ۔ ہم اس روایت کو بمع سند مکمل نقل کریں گے اور پھر اس کے ضعف کی وضاحت کریں گے۔ روایت بمع سند یوں ہے : قال الطبرانی فی الاوسط: حدثنا علی بن سعید الرازی ثنا عبداللّٰہ بن أبی رومان الاسکندرانی ثنا عیسیٰ بن واقدنا محمد بن عمرو عن أبی سلمۃ عن أبی ہریرۃ أن رسول اللّٰہ صلي اللّٰه عليه وسلم قال: من لم یوتر فلا صلوٰۃ لہ فبلغ ذلک عائشہ فقالت: من سمع ھٰذا من أبی القاسم صلي اللّٰه عليه وسلم مابعد العھد وما نسینا إنما قال أبوالقاسم صلي اللّٰه عليه وسلم:من جاء بصلوات الخمس یوم القیمۃ حافظ علی وضوئھا ومواقیتھا ورکوعہاوسجودھا لم ینتقص منھن شیئا کان لہ عنداللّٰہ عہد ألایعذبہ ومن جاء وقد انقص منھن عذبہ ثم قال لم یروہ عن محمد بن عمرو الإعیسیٰ،تفردبہ عبداللّٰہ بن أبی رومان ۲۴؎ اس روایت کی سند میں دو راوی علی بن سعید (م ۲۹۹ ھ) اور محمد بن عمرو (م ۱۴۵ ھ) آئمہ محدثین رحمہم اللہ کے ہاں ناقابل اعتماد ہیں ۔ہم ان دونوں رواۃ کے بارے میں آئمہ کا تبصرہ ذیل میں نقل کیے دیتے ہیں :