علم حدیث میں اسناد و متن کی تحقیق کے اصول محدثین اور فقہاء کے طرز عمل کی روشنی میں

اور اس طرح ایک حدیث کو رد کرنے کا جواز نکالتے ہیں حالانکہ لفظوں کا یہ اختلاف کلام نبوت کے اعجاز کی دلیل ہے جس سے اہل بصیرت کو یقین حاصل ہوجاتا ہے کہ یہ احادیث فی الواقعہ زبان نبوت سے ہی صادر ہوسکتی ہیں ، جن میں مقتضائے حال کی مطابقت کو پیش نظر رکھا گیا ہے اور جو صحابہ کرام رضی اللہ عنہم آپ صلی اللہ علیہ وسلم کے ان سے خطاب کے وقت موقع پر موجود تھے ان کے پاس آپ صلی اللہ علیہ وسلم نے سننے کا لفظ استعمال کیا اور جب آپ صلی اللہ علیہ وسلم ان سے نہ مخاطب تھے اور نہ وہ سن رہے تھے وہاں حضرت عائشہ رضی اللہ عنہا کے پاس علم کا لفظ ذکر کیا ہے۔ قلیب بدر کے بارے میں حدیث عمر رضی اللہ عنہ پر عائشہ صدیقہ رضی اللہ عنہا کے منہج اِستدراک اور ان کے مابین اختلافِ تنوع کی تطبیق وتوفیق آپ ملاحظہ فرماچکے ہیں ۔ اِستدراک عائشہ رضی اللہ عنہا سے نہ توصحیح سند کے ساتھ ثابت ہونے والی روایت کا انکا ر لازم آتا ہے اور نہ ہی اس کے خلافِ قرآن ہونے کی دلیل ہاتھ آتی ہے۔ خود حضرت عائشہ رضی اللہ عنہا نے اس حدیث کی ایسی توجیہہ بیان فرمائی ہے کہ جس سے بظاہر نظر آنے والا تعارض ختم ہوکر رہ جاتا ہے۔ اگر ان کا مقصد حدیث رسول صلی اللہ علیہ وسلم کو مراد قرآن کے خلاف ثابت کرنا ہوتا تو ہمارے خیال میں جو اعتراض سیدہ عائشہ رضی اللہ عنہا قرآنی آیت کی روشنی میں حدیث ِعمر رضی اللہ عنہ پر کررہی ہیں بالکل وہی اعتراض ان کی توجیہہ پربھی صادق آتا، کیونکہ دونوں روایتوں کا باہمی اختلاف لم یسمعوا اور لم یعلموا کے الفاظ میں ہے ۔حدیث مبارکہ میں لم یسمعوا کے الفاظ حضرت عمر رضی اللہ عنہ نے، جبکہ لم یعلموا کے الفاظ حضرت عائشہ رضی اللہ عنہا نے نقل فرمائے ہیں ،لیکن حضرت عائشہ رضی اللہ عنہا کے ان ا لفاظ سے رسول اللہ صلی اللہ عليہ وسلم کے خطاب پر خود انہی کی طرف سے کیے جانے والے اعتراض کا تسلی بخش جواب فراہم نہیں ہوتا ہے، کیونکہ اصل سوال رسول اللہ صلی اللہ عليہ وسلم کے مردوں کے خطاب پر تھا، نہ کہ قلیب بدر کی موجودہ حالت پر۔ مزید برآں اس کی توجیہہ لم یسمعوا سے کریں یا لم یعلموا سے، سوال اپنی جگہ بہرحال برقرار رہتا ہے۔ معلوم ہوتا ہے کہ اگر عائشہ صدیقہ رضی اللہ عنہا قرآن کے حدیث سے تعارض کی نشاندہی کرنا چاہتی تھیں تو وہ تعارض خود ان کے بیان کردہ الفاظ میں پایا جاتا ہے۔ کیا اس قدر باریک بین نگاہ رکھنے والی ام المومنین حضرت عائشہ رضی اللہ عنہا کو اپنی روایت کے الفاظ کا خلاف قرآن ہونا سمجھ نہ آیا۔ نیز حقیقت بھی یہی ہے کہ عائشہ صدیقہ رضی اللہ عنہا کا مقصد آئندہ دور میں کسی بھی وقت سر اٹھانے والے اس فتنہ کی سرکوبی کرنا تھاکہ حدیث اور قرآن میں تعارض بھی ہوسکتا ہے،بلکہ جمع وتطبیق کے ذریعے سے اس کی کئی پہلوؤں سے قابل قبول توجیہہ کی جاسکتی ہے ۔جس کی بنیاد پر کسی ایک دلیل کو مرجوح یا منسوخ قرار دے کر ترک کرنے کی بجائے دونوں روایتوں پر عمل کیا جاسکے۔ مسئلہ سماع موتی جہاں تک ام المؤمنین رضی اللہ عنہا کا سماع موتی کے باب میں آیت قرآنی ﴿اِنَّکَ لاَ تُسْمِعُ الْمَوْتٰی﴾ کو پیش کرنے کا تعلق ہے تو یہ بھی انکار حدیث کی غرض سے نہیں ہے، بلکہ اس حدیث کی وجہ سے یہ آیت پیش کی ہے جس کا انہیں علم تھا اور وہ لقد علموا کے الفاظ پرمشتمل تھی۔ورنہ یہی آیت رسول اللہ صلی اللہ علیہ وسلم کے سامنے بھی پیش کی گئی تھی اور آپ صلی اللہ علیہ وسلم نے اسے اپنے فرمان کے خلاف نہیں سمجھا تھا، جیساکہ مسند احمد میں ہے: أن رسول اللّٰہ صلي اللّٰه عليه وسلم ترک قتلی بدر ثلاثۃ أیام حتی جیفوا ثم أتاھم فقام علیہم فقال یا أمیۃ بن خلف یا أبا جہل بن ہشام یاعتبۃ بن ربیعۃ یا شیبۃ بن ربیعۃ ہل وجدتم ما وعدکم ربکم حقا فانی قد وجدت ما وعدنی ربی حقا قال فسمع عمر صوتہ فقال یارسول اللّٰہ صلي اللّٰه عليه وسلم أتنا دیھم بعد ثلاث وھل یسمعون یقول اللّٰہ عزوجل: