علم حدیث میں اسناد و متن کی تحقیق کے اصول محدثین اور فقہاء کے طرز عمل کی روشنی میں

ذیل میں ہم کوشش کرتے ہیں کہ فقہائے احناف رحمہم اللہ کے پیش کردہ اصول درایت کا تذکرہ کرتے ہوئے ان کا اصولی محاکمہ بھی کریں اور ان مثالوں کا جائزہ لیں جو ان کے اصول درایت پر پورا نہ اترنے کی وجہ سے مردود قرار پائی ہیں ۔ 1۔ مخالف قرآن روایات فقہائے احناف رحمہم اللہ کا اصول یہ ہے کہ جب اخبار آحاد قرآن کریم کے عمومات اور ظواہر کے خلاف پڑتی ہوں تو قرآن کریم کو قبول کیا جائے گا، جبکہ اخبار آحاد ناقابل عمل قرار پائیں گی، کیونکہ قرآن کریم قطعی الثبوت ہے اور اس کے عمومات وظواہر بھی قطعی الدلالۃ ہیں ، جبکہ اس کے برعکس اخبار آحاد ظنی الثبوت اور ظنی الدلالت ہیں ۔ لہٰذا قطعی کو ظنی پر ترجیح دی جائے گی۔ ٭ اِمام سرخسی رحمہ اللہ (م ۴۹۰ ھ) اس اصول کی وضاحت میں فرماتے ہیں : إذا کان الحدیث مخالفا لکتاب اللّٰہ تعالیٰ فإنہ لا یکون مقبولا وحجۃ للعمل بہ عاما کانت الآیۃ أو خاصا نصا أو ظاہرا عندنا علی ما بینا أن تخصیص العام بخبر الواحد لا یجوز ابتداء وکذالک ترک الظاہر فیہ والحمل علی نوع من المجاز لایجوز بخبر الواحد عندنا ۱۲؎ ’’ اگر حدیث کتاب اللہ کے خلاف ہو تو ہمارے نزدیک وہ قابل قبول اور عمل کے لیے حجت نہیں ہوسکتی، چاہے آیت عام ہو یا خاص، ظاہر ہو یا نص۔ ہم بتا چکے ہیں کہ کتاب اللہ کے عام حکم کو خبر واحدکی بنا پر خاص کرنا یا اس کے ظاہر ی مفہوم کو خبر واحد کی وجہ سے کسی مجازی معنی پر محمول کرنا جائز نہیں ہے۔‘‘ اصول کا تنقیدی جائزہ فقہائے اسلام رحمہم اللہ کے اقوال کی روشنی میں کتاب وسنت کو دیکھا جائے تو ان میں اختلاف محسوس ہوتاہے۔ مثال کے طور پر ہم صرف علامہ ابو علی نظام الدین الشاشی رحمہ اللہ کی مشہور کتاب أصول الشاشیپر ایک نظر ڈال لیں تو معلوم ہو جائے گا کہ صحیح احادیث اور فقہ اِمام میں موافقت پیدا کرنے کے لیے کتنی جدوجہد کی گئی ہے۔ ٭ علامہ الشاشی رحمہ اللہ مبحث حکم الخاص من الکتاب میں رقمطراز ہیں : حکم الخاص من الکتاب وجوب العمل بہ لامحالۃ ۳؎ ۱ ’’کتاب اللہ کے حکم خاص پر لامحالہ عمل واجب ہے۔اگر کوئی خبرواحد یا قیاس اس کے متعارض ہو، توکتاب پر عمل ہوگا۔‘‘ اس اصل وقاعدہ کے مطالعہ سے تین امور سامنے آئے ہیں : 1۔ قرآن کریم نے سنت میں وار د امر کو واجب قرار نہیں دیاہے۔ 2۔ سنت میں وارد امر، جو قرآن میں موجود نہیں ، اگر واجب قرار پایا تو قر آن کا نسخ لازم آئے گا۔ 3۔ سنت کے ذریعے قرآن کا نسخ جائز نہیں ۔ ان تینوں مقدمات کے ذریعہ انہوں نے بہت سے مسائل کو ساقط الاعتبار قرار دے دیا ہے، جن کا وجوب صرف سنت سے ثابت ہے۔جیسے قراء ۃ الفاتحۃ اور اعتدال وطمانینت فی الصلوۃ وغیرہ۔ واضح رہے کہ اگر کسی مسئلہ پر قرآن دلالت نہیں کررہا ہے، لیکن سنت کی دلالت موجود ہے تو اس سے قرآن کا نسخ لازم نہیں آئے گا، بلکہ یہ ایک زائد حکم ہوگا جس کی اطاعت ضروری ہے۔ ورنہ سنت ر سول صلی اللہ علیہ وسلم کا اکثر حصہ متروک العمل ہوجائے گا،کیونکہ معترض فوراً کہہ