اجتماعی نظام

روٹی کے ٹکڑوں کو کیا کریں؟ السلام علیکم ورحمة اللہ وبرکاتہ کسی صاحب نے پوچھا ہے یہاں بچے ہوئے روٹی کے ٹکڑوں کو دوبارہ استعمال نہ کیاجائے تو پھر کیا کرنا چاہئے جبکہ دفن کےلئے جگہ بھی نہ ہو۔ الجواب بعون الوہاب بشرط صحة السؤال وعلیکم السلام ورحمة اللہ وبرکاتہ! الحمد للہ، والصلاة والسلام علیٰ رسول اللہ، أما بعد! رزق اور کھانے پینے کی اشیاء اللہ کی بہت بڑی نعمت ہیں۔ اس نعمت کی ناشکری بہت بڑا گناہ ہے۔ بچی ہوئی روٹی ’سالن یا کسی دوسری چیز کو پھینک دینا’ یہ بھی ناشکری کےضمن میں آتا ہے۔ کتنے ایسے لوگ ہیں جو سوکھی ہوئی روٹی کو بھی ترستے ہیں۔ کتنے ایسے مفلوک الحال ہیں جو مہینوں سالن کو ترستے رہتے ہیں اور کتنے ایسے غریب ہیں جو مہینوں پھلوں کی شکل نہیں دیکھتے یہاں بعض لوگ بچی ہوئی روٹی کے ٹکرے جانوروں کو کھلاتےہیں ’بعض چڑیوں جیسے پرندوں کےلئے باہر رکھ دیتے ہیں اور بعض دوبارہ کسی نہ کسی چیز میں استعمال کرلیتے ہیں۔ یہ تینوں طریقے درست اور مفید ہیں لیکن انہیں جلادینا یا پھر دفن کردینا مستحسن معلوم نہیں ہوتا۔ اگر مجبوری ہوتو الگ بات ہے لیکن اس کے باوجود کوشش کرنی چاہئے کہ اسے دوبارہ کسی مصرف میں لایا جائے ۔امور خانہ داری سے دلچسپی رکھنے والی خواتین خشک روٹی کو دوبارہ استعمال کرنے کےلئے متعدد طریقوں سے کام لیتی ہیں۔ بہرحال مجبوری کے بغیر جلانا یا پھینکنا جائز نہیں۔ اگر روٹی بچ جائے تو دوسرے وقت کم پکائیں اور بچی ہوئی ساتھ استعمال کرلیں اس میں نہ کوئی قباحت ہے نہ نقصان ۔ ھذا ما عندی واللہ اعلم بالصواب فتاویٰ صراط مستقیم ص564