حقوق نسواں اور حقوق مرداں

میاں بیوی کی رنجش میں میکے والوں کا کردار حضرت سہل بن سعد رضی اللہ عنہ روایت کرتے ہیں کہ رسول اللہ صلی اللہ علیہ وسلم اپنی صاحبزادی حضرت فاطمہ رضی اللہ عنہا کے گھر تشریف لے گئے، وہاں حضرت علی موجود نہیں تھے، آپ نے اپنی صاحبزادی سے پوچھا: تمھارے عم زاد(علی) کہاں ہیں ؟ حضرت فاطمہ رضی اللہ عنہا نے جواب دیا: ((کَانَ بَیْنِی وَبَیْنَہُ شَيئٌ فَغَاضَبَنِیْ فَخَرَجَ فَلَمْ یَقِلْ عِنْدِیْ)) ’’میرے اور ان کے درمیان کوئی بات ہو گئی تھی تو وہ گھر سے غصے میں چلے گئے اور میرے پاس قیلولہ بھی نہیں کیا۔ ‘‘ رسول اللہ صلی اللہ علیہ وسلم نے کسی شخص سے کہا: ’’ان کو دیکھو! وہ کہاں ہیں ؟ ‘‘ اس نے آ کر بتلایا کہ حضرت علی مسجد میں سوئے ہوئے ہیں۔ رسول اللہ صلی اللہ علیہ وسلم مسجد میں تشریف لائے، دیکھا کہ وہ واقعی وہاں سوئے ہوئے ہیں، ان کی چادر (نیند کی وجہ سے) ان کے پہلو سے گری ہوئی ہے اور ان کے جسم کو مٹی لگ گئی ہے، رسول اللہ صلی اللہ علیہ وسلم نے فرمایا: ((قُمُ أَبَا تُرَابٍ، قُمْ أَبَا تُرَابٍ))