حقوق نسواں اور حقوق مرداں

مال و دولت کی فروانی، ہلاکت کا پیش خیمہ نبیٔ کریم صلی اللہ علیہ وسلم، ازوج مطہرات، دیگر اہل بیت اور صحابۂ کرام کے مزاج و معاشرت کی اس سادہ اور دنیا کے اسبابِ راحت و آسائش سے بے نیازی کی مذکورہ تفصیلات یہاں بیان کرنے سے اصل مقصد یہ ہے کہ آج کل ہمارے رہن سہن، معاشرت اور طرز زندگی میں عیش و عشرت اور تکلفات کی جو ارزانی ہوگئی ہے اور آرائش و زیبائش کا جو طوفان برپا ہے، اس کا ادنی سا تعلق بھی حضور کے طرز زندگی اور آپ کی معاشرت سے ہے؟ یقیناً نہیں ہے۔ آپ نے ان تکلفات کو، جنھیں ہم نے زندگی کے لوازمات بنا لیا ہے، قطعاً پسند نہیں فرمایا ہے، بلکہ آپ نے تو دنیا کی آسائشوں اور سہولتوں کی فراوانی کو تباہی و بربادی کاسبب بتلایا ہے۔ چنانچہ ایک حدیث میں آپ نے فرمایا: ((فَوَاللّٰہِ مَا الْفَقْرُ أَخْشٰی عَلَیْکُمْ وَلٰکِنْ أَخْشٰی عَلَیْکُمْ أَنْ تُبْسَطَ عَلَیْکُمْ الدُّنْیَا کَمَا بُسِطَتْ عَلَی مَنْ کَانَ قَبْلَکُمْ فَتَنَافَسُوھا کَمَا تَنَافَسُوھا وَتُلْھیَکُمْ کَمَا أَلْہَتْہُمْ)) ’’اللہ کی قسم! مجھے تمھارے فقر سے کوئی اندیشہ نہیں، مجھے اندیشہ ہے تواس بات سے کہ تم پر دنیا فراخ کر دی جائے گی جس طرح کہ تم سے پہلے لوگوں پر فراخ کر دی گئی تھی۔ پس تم بھی اس دنیا میں اسی طرح رغبت کرو گے جیسے انھوں نے رغبت کی تھی اور یہ رغبت پھر تمھیں بھی اسی طرح ہلاک کردے گی جیسے اس نے ان کو ہلاک کردیا تھا۔ ‘‘ [1]

[1] صحیح البخاري، حدیث:کتاب الرقاق، باب مایحذر من زھرۃ الدنیاوالتنافس فیہا، حدیث: 6425