حقوق نسواں اور حقوق مرداں

عورت کے ساتھ حسن معاشرت کی تاکید اسلام نے عورت کے ساتھ حسن سلوک کی بھی بڑی تاکید کی ہے، اس کے لیے اللہ تعالیٰ نے قرآن کریم میں معاشرت بالمعروف کی اصطلاح استعمال فرمائی ہے: ﴿وَعَاشِرُوْھُنَّ بِالْمَعْرُوْفِ ﴾ [النساء19] ’’تم ان کے ساتھ اچھے طریقے سے گزر بسر کرو۔ ‘‘ جس کا مطلب، عورت کے حقوق کی صحیح ادائیگی، اس کی ضروریات زندگی (نان و نفقہ، لباس) کی فراہمی اور اپنے وسائل کے مطابق اسے ہر طرح کی آسانی اور سہولتیں بہم پہنچانا ہے۔ اس سلسلے کی متعدد احادیث اس سے قبل ’’مرد اور عورت دونوں کی خدمات کا دائرۂ کار‘‘ عنوان کے تحت بیان ہوچکی ہیں۔ یہاں چند احادیث اور ملاحظہ فرمائیں۔ رسول اللہ صلی اللہ علیہ وسلم نے فرمایا: ((وَاسْتَوْصُوا بِالنِّسَائِ خَیْرًا، فَإِنَّ الْمَرْأَۃَ خُلِقَتْ مِنْ ضِلَعٍ وَإِنَّ أَعْوَجَ شَیْئٍ فِی الضِّلَعِ أَعْلَاہُ، إِنْ ذَھَبْتَ تُقِیمُہُ کَسَرْتَہُ وَإِنْ تَرَکْتَہُ لَمْ یَزَلْ أَعْوَجَ اِسْتَوْصُوا بِالنِّسَائِ خَیْرًا)) [1] ’’عورتوں کے ساتھ بھلائی کرنے کی وصیت قبول کرو، اس لیے کہ عورت کی پیدائش پسلی سے ہوئی ہے اور پسلی میں سب سے ٹیڑھا حصہ اس کا بالائی حصہ ہے، اگر تم اسے سیدھا کرنا چاہو گے تو اسے توڑ بیٹھو گے (لیکن سیدھا نہیں کر سکو گے حتی کہ معاملہ طلاق تک پہنچ جائے گا) اور اگر تم اسے چھوڑ دو گے تو وہ ٹیڑھا ہی رہے گا (یعنی عورت کی فطری کجی کبھی ختم نہیں ہوگی، اس لیے اس کو برداشت کرتے ہوئے) اس کے ساتھ بھلائی کرتے رہو۔ (اس کے ساتھ نباہ کرنے کا صرف یہی طریقہ ہے)۔ ‘‘

[1] صحیح بخاری کتاب النکاح، باب الوصاۃ بالنساء، حدیث نمبر:5186