حجیت قراءات

قراء ات ِسبعہ کا حروف ِسبعہ سے تعلق بعض لوگوں کا خیال ہے کہ حدیث مبارکہ میں وارد’’ اَحرف سبعہ‘‘ سے آئمہ سبعہ کی قراء ات مراد ہیں،چنانچہ ان کے خیال میں سیدنا نافع رحمہ اللہ کی قراء ت ایک حرف، سیدنا عبد اللہ بن کثیر مکی رحمہ اللہ کی قراء ت دوسرا حرف… علی ہذا القیاس سات حروف آئمہ سبعہ کی سات قراء ات ہیں، لیکن امر واقعہ یہ ہے کہ یہ رائے بالکل باطل ہے، جس کی مندرجہ ذیل وجوہات ہیں: ۱۔ اس رائے سے لازم آتاہے کہ اَحرف سبعہ تمام کے تمام باقی ہیں اور ان میں سے کوئی ایک بھی منسوخ نہیں ہوا ہے اوران تمام کے ساتھ قراء ت کرنا آج بھی صحیح ہے، حالانکہ یہ بات اجماع ِاُمت کے خلاف ہے،کیونکہ اولاً اُمت کی آسانی کی غرض سے اَحرف سبعہ کو نازل کیا گیا، پھر عرضۂ اَخیرہ میں ان میں سے بہت سارے حروف کو منسوخ کردیاگیا۔ ۲۔ اس رائے کا یہ نتیجہ نکلے گا کہ سیدنا عثمان رضی اللہ عنہ کاکتابتِ مصاحف اوراس پر لوگوں کوجمع کرنے کا عمل بے فائدہ تھا، حالانکہ قراء ات ِشاذہ جو مصدقہ رسمِ مصاحف میں موجود نہ تھیں،ان پر مشتمل مصاحف کو جلانے کا اس کے علاوہ کوئی اورداعیہ اور وجہ نہ تھی۔ ۳۔ اس سے یہ بھی لازم آتاہے کہ آئمہ سبعہ کی قراء ات میں تمام کے تمام حروف ِسبعہ موجود ہیں،جس کامطلب ہے کہ امام ابوجعفر رحمہ اللہ ، امام یعقوب رحمہ اللہ اور امام خلف العاشر رحمہ اللہ ، جن کا شمار آئمہ سبعہ میں نہیں ہوتا ،ان کی قراء ات اور روایات اَحرف ِسبعہ میں سے نہیں ہیں،حالانکہ یہ بات اُمت کی متفقہ رائے اور اجماع کے خلاف ہے۔ ۴۔ آئمہ سبعہ میں سے ہر ایک سے بہت سے راویوں نے مختلف روایات نقل کی ہیں۔یہ