حجیت قراءات

اسے ماضی بناتے ہوئے قَالَ اور اَمر بناتے ہوئے قُلْ دونوں طرح پڑھاگیا ہے۔ مزید برآں کسی فعل کو مضارع سے اَمرکی طرف لوٹانا بھی اس نوع میں شامل ہے، مثلاً ٭ ﴿فَلَمَّا تَبَیَّنَ لَہٗ قَالَ اَعْلَمُ اَنَّ اللّٰه عَلٰی کُلِّ شَئ قَدِیْرٌ﴾ (البقرۃ:۲۵۹) اس آیت میں فعل مضارع کی قراء ت کی صورت میں أَعْلَمُ کو وصل وابتداء میں ہمزہ قطعی مفتوح اور میم کے ضمہ کے ساتھ پڑھاگیاہے۔ دوسری قراء ت میں اس کلمہ کو امر بناتے ہوئے اعْلَمْ کے ہمزہ کو وصلی شمارکیا گیا ہے، جو حالت ِوصل میں حذف کردیاجائے گا اور حالت ِابتدا میں اسے مکسور پڑھا جائے گا۔ ۳… وجوۂ اَعراب کا اختلاف ٭ ﴿وَلاَ تُسْئَلُ عَنْ اَصْحٰبِ الْجَحِیْمِ﴾ (البقرہ:۱۱۹) اس آیت میں تُسْأَلُ کو تائے مضمومہ اور لامِ مرفوعہ کے ساتھ پڑھاگیاہے، چنانچہ ا س صورت میں لاء نافیہ ہوگااورفعل مضارع نواصب وجوازم سے خالی ہونے کی بناء پر مرفوع ہوگا۔ دوسری قراء ت کے مطابق تَسْئَلْ کو تائے مفتوحہ اور لام مجزومہ سے پڑھا جائے گا۔ اس وقت لائے نہی ہوگا اورفعل مضارع حالت ِجزمی میں ہوگا۔ ٭ ﴿اِلَّا اَنْ تَکُوْنَ تِجَارَۃٌ﴾ (النساء:۲۹ ) اس آیت میں تِجَارَۃً کوتَکُوْنَ کی خبر بناتے ہوئے منصوب پڑھا گیا ہے، جبکہ دوسری قراء ت میں تکُوْنَ کو کان تامہ مانتے ہوئے تِجَارَۃً کو بر بنائے فاعل مرفوع پڑھا گیا ہے۔ ٭ ﴿ وَلِبَاسَ التَّقْوٰی﴾ (الاعراف:۲۶) لِبَاسَ کی سین کو مرفوع اورمنصوب دونوں طرح پڑھا گیا ہے۔ ٭ ﴿اللّٰه الَّذِی لَہٗ مَا فِی السَّمٰوٰتِ وَمَا فِی الْاَرْضِ﴾ (ابراہیم:۲) اس میں لفظ الله کو مرفوع اورمجرور دونوں طرح پڑھا گیا ہے۔ ٭ ﴿ فِی لَوْحٍ مَّحْفُوْظٍ﴾ (البروج:۲۲) مَحْفُوْظٍ کو مجرور و مرفوع دونوں طرح پڑھا گیا ہے ۔