حقوق مصطفٰی صلی اللہ علیہ وسلم اور توہین رسالت کی شرعی سزا

بسم اللّٰه الرحمن الرحیم کفر و اسلام کی آویزش: اسلام اور کفر کی آویزش اور حق و باطل کا معرکہ تو ابتدائے آفرینش سے ہی جاری ہے۔حضرت آدم علیہ السلام کی تخلیق کے ساتھ ہی قوائے خیر و شر میں آویزش شروع ہوگئی تھی اورحضرت آدم علیہ السلام کے مقابلے میں ابلیس کھڑا ہوگیا تھا۔ قرآن بتاتا ہے کہ اس نے اللہ کے حکم سے اپنی بغاوت و سرتابی اور حضرت آدم علیہ السلام اور اولادِ آدم کے خلاف اپنی معاندانہ مہم کا اعلان یوں کردیا تھا: { اَنَا خَیْرٌ مِّنْہُ خَلَقْتَنِیْ مِنْ نَّارٍ وَّ خَلَقْتَہٗ مِنْ طِیْنٍ} [الأعراف: ۱۲] ’’میں اس (آدم) سے بہتر ہوں، تونے مجھے آگ سے بنایا ہے اور اس کی تخلیق مٹی سے کی ہے۔‘‘ جب اللہ تعالیٰ نے اسے دھتکار دیا تو اس نے {اَنْظِرْنِیْٓ اِلٰی یَوْمِ یُبْعَثُوْنَ} [الأعراف: ۱۴] کہہ کر اللہ سے قیامت تک کے لیے مہلت مانگی۔ اور اللہ نے اسے {اِنَّکَ مِنَ الْمُنْظَرِیْنَ} [الأعراف: ۱۴] کہہ کر مہلت دے دی۔ اب اس نے نعرۂ بغاوت و عداوت بلند کیا۔ سورۃ الاعراف میں ہے: { فَبِمَآ اَغْوَیْتَنِیْ لَاَقْعُدَنَّ لَھُمْ صِرَاطَکَ الْمُسْتَقِیْمَ . ثُمَّ لَاٰتِیَنَّھُمْ مِّنْم بَیْنِ اَیْدِیْھِمْ وَ مِنْ خَلْفِھِمْ وَ عَنْ اَیْمَانِھِمْ وَ عَنْ شَمَآئِلِھِمْ وَ لَا تَجِدُ اَکْثَرَھُمْ شٰکِرِیْنَ} [الأعراف: ۱۶، ۱۷]