کتاب: حج اور عمرہ کے مسائل - صفحہ 194
عَنْ اَبِیْ حُمَیْدٍ اَوْ عَنْ اَبِیْ اُسَیْدٍ رَضِیَ اللّٰہُ عَنْہُمَا قَالَ: قَالَ رَسُوْلُ اللّٰہِ صلی اللّٰهُ علیہ وسلم (( اِذَا دَخَلَ اَحَدُکُمُ الْمَسْجِدَ فَلْیَقُلْ (( اَللّٰہُمَّ افتَحْ لِیْ اَبْوَابَ رَحْمَتِکَ)) وَاِذَا خَرَجَ فَلْیَقُلْ ((اَللّٰہُمَّ اِنِّی اَسْئَلُکَ مِنْ فَضْلِکَ )) رَوَاہُ مُسْلِمٌ[1]
حضرت ابو حمید یا ابو اسید رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا ’’جب کوئی شخص مسجد میں داخل ہو وہ یہ دعا مانگے ’’یا اللہ! میرے لئے اپنی رحمت کے دروازے کھول دے۔‘‘ اور جب مسجد سے باہر نکلے تو یہ دعا مانگے’’یا اللہ! میں تیرے فضل کا طالب ہوں۔‘‘ اسے مسلم نے روایت کیا ہے۔
مسئلہ 408: مسجد میں داخل ہونے کے بعد پہلے تحیۃ المسجد ادا کرنی چاہئے پھر قبر مبارک پر حاضر ہو کر درود و سلام پڑھنا چاہئے۔
عَنْ اَبِیْ قَتَادَۃَ رضی اللّٰهُ عنہ قَالَ دَخَلْتُ الْمَسْجِدَ وَرَسُوْلُ اللّٰہِ صلی اللّٰهُ علیہ وسلم جَالِسٌ بَیْنَ ظَہْرَانِی النَّاسِ قَالَ فَجَلَسْتُ فَقَالَ رَسُوْلُ اللّٰہِ صلی اللّٰهُ علیہ وسلم (( مَا مَنَعْکَ اَنْ تَرْکَعْ رَکْعَتَیْنِ قَبْلَ اَنْ تَجْلِسَ؟)) قَالَ: فَقُلْتُ یَا رَسُوْلَ اللّٰہِ صلی اللّٰهُ علیہ وسلم رَاَیْتُکَ جَالِسًا وَالنَاسُ جُلُوْسٌ، قَالَ (( فَاِذَا دَخَلَ اَحَدُکُمُ الْمَسْجِدَ فَلاَ یَجْلِسَ حَتّٰی یَرْکَعْ رَکْعَتَیْنِ )) رَوَاہُ مُسْلِمٌ[2]
حضرت ابو قتادہ رضی اللہ عنہ کہتے ہیں میں مسجد نبوی ( صلی اللہ علیہ وسلم ) میں حاضر ہوا اور رسول اللہ صلی اللہ علیہ وسلم صحابہ کرام رضی اللہ عنہم کے درمیان تشریف فرما تھے۔ میں بھی ان کے پاس بیٹھ گیا۔ رسول اللہ صلی اللہ علیہ وسلم نے فرمایا ’’بیٹھنے سے پہلے دو رکعتیں (تحیۃ المسجد) پڑھنے سے آپ کو کس چیز نے روکا؟‘‘ حضرت ابو قتادہ رضی اللہ عنہ نے عرض کیا ’’یا رسول اللہ صلی اللہ علیہ وسلم ! میں نے آپ کو اور لوگوں کو بیٹھے دیکھا (تومیں بھی بیٹھ گیا)‘‘ آپ صلی اللہ علیہ وسلم نے ارشاد فرمایا’’ جب کوئی شخص مسجد میں آئے تو اس وقت تک نہ بیٹھے جب تک دو رکعت (تحیۃ المسجد) ادا نہ کر لے۔‘‘ اسے مسلم نے روایت کیا ہے۔
مسئلہ 409: مسجد نبوی صلی اللہ علیہ وسلم میں اگر روضۃ الجنۃ میں عبادت کرنے کا موقع مل جائے تو وہ زیادہ اجر و ثواب کا باعث ہے۔
[1] کتاب الحج ، باب فضل المساجد الثلاثۃ.
[2] کتاب الحج ، باب فضل الصلاۃ بمسجدی مکۃ والمدینۃ.