حدیث سبعہ احرف کا عمومی جائزہ

دوسری روایت حضرت حذیفہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا:احجار المراء کے مقام پر میری جیریل امین علیہ السلام سے ملاقات ہوئی تو میں نے کہا: اے جبریل، میں ایک ناخواندہ امت کی طرف رسول بنا کر بھیجا گیا ہوں۔ جس میں مردوں و عورتوں کے علاوہ بچے ، بچیاں اورایسے ضعیف العمر بوڑھے بھی ہیں کہ جنہوں نے کبھی کو ئی کتاب پڑھ کر نہیں دیکھی۔ تو جبریل علیہ السلام نے کہا: إن القرآن نزل علی سبعۃ أحرف۔ ’’بلاشبہ قرآن مجید سات حروف پر نازل ہوا ہے۔‘‘ [1] مذکورہ دلائل سے یہ بات بالکل واضح ہو جاتی ہے کہ سات حروف میں قراء ۃ کی اجازت ہجرت نبوی صلی اللہ علیہ وسلم کے بعد دی گئی تھی۔ چنانچہ ابن حجر نے اس حقیقت کو بیان کرتے ہوئے لکھا ہے: ’’یہ بات یقینا پایہ ثبوت کو پہنچ چکی ہے کہ سات حروف میں قرأء ۃ کی آسانی کا نزول ہجرت کے بعد کا واقعہ ہے۔جیسا کہ ابی بن کعب کی حدیث سے واضح ہو چکا ہے کہ جبریل امین علیہ السلام کی رسول اکرم صلی اللہ علیہ وسلم سے ملاقات بنوغفار کے تالاب کے پاس ہوئی تھی اور بنوغفار کا تالاب مدینہ منورہ میں واقع ہے ،جہاں یہ قبیلہ آباد تھا۔ [2]

[1] فضائل القرآن ،از ابو عبید قاسم بن سلام ، ض ۳۳۸، مسند أحمد ۵-۴۰۰، مسند احمد کے محقق شعیب ارناؤؤط نے اس سند کو حسن اور اس روایت کو صحیح لغیرہ قرار دیا ہے۔اور امام طبری نے اپنی تفسیر ۱-۳۵میں اسے ابی بن کعب رضی اللہ عنہ کے حوالہ سے بیا ن ہے اور امام ترمذی نے بھی ابی بن کعب رضی اللہ عنہ سے حوالہ سے بیان کیا ہے ، لیکن اس میں احجار المراء کا ذکر نہیں ہے۔ (سنن الترمذی ۵-۴۴)اور امام مجاہد کے بقول أحجار المراء مدینہ النبی صلی اللہ علیہ وسلم میں ایک جگہ کا نام ہے۔ یہ بات ان سے ابراہیم الحربی نے غریب الحدیث ۱-۱۰۴ میں ، ابن الجوزی نے غریب الحدیث۲-۳۵۵ میں ، اور ابن الأثیر نے النہایۃ فی غریب الحدیث ۱-۳۴۳ میں نقل کی ہے۔ نیز ابن منظور الأفریقی فرماتے ہیں: ہی بکسر المیم:قباء ، فأما المراء بضم المیم فہوا داء یصیب النخل۔ لسان العرب ۶-۴۱۸۸’’ یہ میم کے کسرہ (زیر) کے ساتھ ہے ، جس سے مقام ِقباء مراد ہے۔ اور جہاں تک میم کے ضمہ ( پیش) کے ساتھ ’المُراء‘ کا تعلق ہے تو اس سے مرادایک بیماری ہے جو کجھور کے درخت کو لاحق ہوتی ہے۔‘‘. [2] فتح الباری ۹-۲۸.