حدیث کا شرعی مقام جلد اول

انفرادی عمل تھا اور احتیاط مزید کے طور پر انجام دیا جاتا تھا، ثانیا تعلیم و تعلم کی غرض سے نہ تھا اس لیے کہ صحابہ کرام کے ناخواندہ ہونے کی وجہ سے معدودے چند ہی تحریری قرآن یا حدیث سے مستفید ہو سکتے تھے۔ ان وضاحتوں کی روشنی میں جب یہ واضح ہو گیا کہ قرآن و حدیث دونوں کی حفاظت اور منتقلی کا ذریعہ ایک ہی تھا یعنی زبانی روایت، پھر نبی کریم صلی اللہ علیہ وسلم سے قرآن کی نسبت قطعی اور حدیث کی نسبت ظنی کس طرح ہو گئی؟، جبکہ حفاظت حدیث اور روایت حدیث کا غیر جانبدارانہ اور بے لاگ مطالعہ یہ بتاتا ہے کہ حدیث کے ساتھ ہر دور میں اہتمام قرآن کے ساتھ اہتمام سے زیادہ رہا، کیونکہ حدیث کا تعلق عملی زندگی سے رہا جس کے بغیر قرآن پر عمل کرنا بھی ناممکن تھا اور عصر صحابہ میں حدیث کے حفاظ قرآن کے حفاظ سے بہت زیادہ رہے، بعد کے ادوار میں اگرچہ قرآن کے حفاظ کی تعداد بہت زیادہ رہتی تھی، پھر بھی حفاظ کی اصطلاح کے حفاظ حدیث کے لیے خاص ہونے سے اس بات کی تائید ہوتی ہے کہ حفظ حدیث کو غیر معمولی اہمیت حاصل تھی۔ حدیث کی عدم قطعیت پر کشمیری نے دوسرا ’’ردہ‘‘ جو یہ چڑھایا ہے کہ ’’نبی صلی اللہ علیہ وسلم یہ نہیں چاہتے تھے کہ قرآن کے الفاظ کی طرح حدیث کے الفاظ کے ساتھ بھی اہتمام برتا جائے‘‘ تو یہ محض ان کا دعوی ہے جو ان کے نظریۂ حدیث کا ترجمان ہے امر واقعہ کا ترجمان نہیں ، بلاشبہ قرآن پاک کا حرف حرف اور لفظ لفظ اللہ تعالیٰ کا کلام ہے جو اس کی صفت ہے اور اس کے کسی حرف اور لفظ میں بالقصد تبدیلی اور تصرف انسان کو دائرہ اسلام سے خارج کر دیتی ہے، مگر اس سے یہ مطلب نکالنا کہ نبی کریم صلی اللہ علیہ وسلم کی قولی حدیث کے الفاظ اور تعبیرات میں تبدیلی جائز ہے درست نہیں ہے، اس لیے کہ حدیث کے بشری اور انسانی کلام ہونے کے باوجود اس کا سرچشمہ بھی وحی الٰہی ہی ہے اور کلام الٰہی کے مساوی نہ ہونے کے باوجود ناقابل تصرف و ناقابل تبدیلی ہے۔ کشمیری محدث عظیم اور اسلام کی حقانیت کی دلیل ’’جیسے مبالغہ آمیز القاب سے ملقب ہونے کے باوجود اپنے اس دعویٰ کے حق میں کوئی دلیل نہیں رکھتے تھے اور میں حدیث کا ایک ادنی خادم ہوتے ہوئے بھی قولی حدیث کے الفاظ کی حفاظت کی فرضیت کے حق میں ایک ایسی دلیل رکھتا ہوں جس کے انکار کی جرأت وہی کر سکتا ہے جس کے دل میں نبی کریم صلی اللہ علیہ وسلم کی محبت و عظمت کا ادنی سا جذبہ بھی نہ ہو اور جو بحث و جدال کا خوگر ہو، چنانچہ براء بن عازب رضی اللہ عنہ سے روایت ہے کہ: نبی صلی اللہ علیہ وسلم نے فرمایا: جب تم سونے کے ارادے سے اپنے بستر پر جاؤ تو جس طرح نماز کے لیے وضو کرتے ہو اسی طرح وضو کرلو، پھر داہنے پہلو پر لیٹ کر کہو: ((اللّٰہم أسلمت نفسی الیک، وفوضت أمری الیک، ووجھت وجھی الیک، والجأت ظھری الیک، رغبۃ ورھبۃ الیک، لا مَلجأ ولا مَنجا منک الا الیک، أمنت بکتابک الذی أنزلت وبنبیک الذی أرسلت))