حدیث کا شرعی مقام جلد اول

میں اس سے قبل یہ واضح کر چکا ہوں کہ رسول اللہ صلی اللہ علیہ وسلم کی حیات پاک میں قرآن پاک کا جو حصہ نازل ہوتا تھا وہ اسی نزولی شکل میں جوں کا توں قلم بند کر لیا جاتا تھا جو اگرچہ آپ کے علم میں تھا، لیکن کسی حدیث میں یہ صراحت نہیں ہے کہ نبی کریم صلی اللہ علیہ وسلم کاتبین وحی میں سے کسی کو یہ حکم دے دیتے تھے کہ نازل ہونے والی آیتوں کو فلاں سورت کے اندر اور نازل ہونے والی سورت کو فلاں سورت سے پہلے یا فلاں سورت کے بعد لکھ لو، اور ایسا ممکن بھی نہیں تھا، کیونکہ قرآن متداول مصحف کی ترتیب سے نازل نہیں ہوتا تھا، بلکہ دعوتی تقاضوں کے مطابق اس کی آیتیں یا سورتیں نازل ہوتی تھیں ، جن حدیثوں میں یہ آیا ہے کہ جب قرآنی آیات نازل ہوتی تھیں تو نبی صلی اللہ علیہ وسلم کاتبین وحی میں سے کسی کو یہ حکم دے دیتے تھے کہ ’’یہ آیت اس سورت میں جس میں یہ واقعہ بیان ہوا ہے درج کر دو‘‘ تو یہ حدیثیں جہاں استنادی حیثیت سے صحیح نہیں ہیں وہیں ان صحیح حدیثوں سے ٹکراتی ہیں جن میں یہ صراحت ہے کہ جنگ یمامہ میں قرآن کے قراء کے بکثرت شہادت پا جانے کے موقع پر جب عمر رضی اللہ عنہ نے خلیفہ اول ابو بکر صدیق رضی اللہ عنہ کو جمع قرآن کا مشورہ دیا تو انہوں نے فرمایا: ((کیف أفعل شیئاً لم یفعلہ رسول اللّٰہ صلي اللّٰه عليه وسلم )) ’’میں وہ کام کس طرح کروں جو کام رسول اللہ صلی اللہ علیہ وسلم نے نہیں کیا۔‘‘[1] اور جب ابو بکر رضی اللہ عنہ نے کاتب وحی زید بن ثابت رضی اللہ عنہ کو جمع قرآن کی ذمہ داری سونپی تو انہوں نے بھی ان دونوں کو مخاطب بناتے ہوئے فرمایا: آپ دونوں وہ کام کس طرح کریں گے جو نبی صلی اللہ علیہ وسلم نے نہیں کیا۔ البتہ یہ بات ثابت ہے کہ رسول اللہ صلی اللہ علیہ وسلم کی حیات پاک میں پورا قرآن پاک قلم بند کر لیا گیا تھا، لیکن کسی ایک جگہ سورتوں کی ترتیب کے بغیر، رہی متداول مصحف کی شکل میں اس کی جمع و ترتیب تو یہ کام نہ نبی صلی اللہ علیہ وسلم کے زمانے میں ہوا تھا اور نہ اس کا امکان تھا، اس کی تائید اس روایت سے ہوتی ہے جسے ابو داود نے اپنی کتاب ’’المصاحف‘‘ میں حسن سند سے نقل کیا ہے کہ علی بن ابی طالب رضی اللہ عنہ فرمایا کرتے تھے کہ ((أعظم الناس فی المصاحف أجراً ابو بکر، رحمۃ اللّٰہ علی أبی بکر، ھو أول من جمع کتاب اللّٰہ)) [2] ’’قرآن پاک کے مصاحف کے نقل و اشاعت کے عمل میں لوگوں میں سب سے زیادہ اجر ثواب کے مستحق ابو بکر ہیں ، ابو بکر پر اللہ کی رحمت نازل ہو وہ اللہ کی کتاب کو جمع کرنے والے پہلے شخص تھے۔‘‘ رہی قرآن پاک کی تلاوت و تبلیغ تو یہ کام نبی صلی اللہ علیہ وسلم کے فرائض منصبی میں داخل تھا جسے آپ پوری ذمہ داری سے ادا کر رہے تھے۔ میں دلائل کے ساتھ یہ بات واضح کر تا آ رہا ہوں کہ قرآن پاک کی اپنی خاص زبان اور اسلوب بیان ہے۔ وہ آیتوں یا سورتوں کی شکل میں تھوڑا تھوڑا کر کے نازل ہوتا تھا جو نبی صلی اللہ علیہ وسلم کی زبان مبارک سے سن کر صحابۂ کرام پھیلا

[1] بخاری:۴۶۷۹ [2] فتح الباری، ص:۲۱۹۵ج ۲