حدیث کا شرعی مقام جلد اول

مبارک سے آپ کا کوئی ارشاد سنتے تو اس کے وحی الٰہی ہونے کا حق الیقین نہ ہوتا اور جب وہی ارشاد وہ ان لوگوں کو نقل کرتے جنہوں نے اسے براہ راست نبی صلی اللہ علیہ وسلم سے نہ سنا ہوتا تو ان کو اس کے کلام رسول یا وحی الٰہی ہونے میں شک ہوتا یا حق الیقین کے بجائے اس کے کلام رسول ہونے کا محض ظن یا گمان ہوتا۔ ثانیا اگر ان کی مراد ’’قرآن کی حفاظت کے حوالے سے روز اول سے حق الیقین کا معاملہ رہا ہے‘‘ سے یہ ہے کہ قرآن کی کسی آیت یا سورت کے نزول کے وقت ہی رسول اللہ صلی اللہ علیہ وسلم کی زبان مبارک سے اس کے سننے والوں کی تعداد ’’حد تواتر‘‘ کو پہنچ جاتی تھی تو اس دعویٰ کی نہ کوئی عقلی دلیل ہے اور نہ واقعات ہی سے اس کی تائید ہو سکتی ہے، بلکہ اس کو اگر ’’متواتر منتقلی‘‘ کی صفت حاصل بھی ہوتی تو مرور وقت کے ساتھ اور وہ بھی بالواسطہ اس طرح اس پر ’’تواتر لفظی‘‘ کا اطلاق درست نہیں ، زیادہ سے زیادہ اسے تواتر معنوی کا نام دے سکتے ہیں ۔ دراصل قرآن کے حق الیقین ہونے کا سبب وحید اس کا معجزانہ اسلوب بیان ہے نہ کہ اس کا روز اول ہی سے تواتر کے ساتھ نبی صلی اللہ علیہ وسلم کی زبان مبارک سے سنا جانا اور پھر فوراً اسے دوسروں تک منتقل کرنا، صحابہ کرام تو اہل زبان تھے آج بھی اگر کسی عربی دان کے سامنے قرآن کی کوئی آیت پڑھی جائے تو اگر وہ اس کا حافظ نہ بھی ہو تب بھی یہ محسوس کر لے گا کہ یہ عام عربی نہیں ہے، اور کسی عام آدمی کا کلام نہیں ہے۔ صحابہ کرام قرآن و حدیث میں ان کے فرق مراتب سے قطع نظر ان کے یکساں ماخذ شریعت ہونے میں نہ کوئی تفریق کرتے تھے اور نہ کر سکتے تھے، کیونکہ خود قرآن کے مطابق اللہ اور رسول کی اطاعت یکساں حکم اور درجہ رکھتی ہے، اور یہ شہادتین میں داخل ہے جو کلمۂ ایمان ہے۔ ۴۔ قرآن کی ایک ایک آیت اور سورت کے بارے میں اللہ کا چیلنج ہر زمانے کے لیے موجود رہا ہے کہ ایسی کوئی مثال پیش کر کے دکھائی جائے۔ ڈاکٹر برنی کی مذکورہ بالا عبارت ببانگ دہل یہ اعلان کر رہی ہے کہ وہ عقل و فہم سے عاری محض ناقل ہیں اور جو کچھ لکھتے ہیں اس کو بھی نہیں سمجھتے، اس کی تفصیل یہ ہے کہ قرآن پاک میں اللہ تعالیٰ نے ان لوگوں کو جو قرآن کو منزل من اللہ نہیں مانتے اور سمجھتے تھے بلاشبہ یہ چیلنج کیا ہے کہ وہ اس کی مانند کوئی ایک ہی سورت بنا کر دکھا دیں ، لیکن قرآن پاک میں کہیں اشارۃ بھی اس کے مانند ایک آیت یا دو آیت بنا کر پیش کرنے کا چیلنج نہیں کیا گیا ہے۔ آغاز امر میں قرآن کے کلام الٰہی ہونے میں شک کرنے والوں یا اس کو نبی صلی اللہ علیہ وسلم کا کلام کہنے والوں کو مطلقاً اس جیسا کلام بنا کر پیش کرنے کا چیلنج کیا گیا، ارشاد الٰہی ہے: ﴿اَمْ یَقُوْلُوْنَ تَقَوَّلَہُ بَل لَا یُؤْمِنُوْنَ ، فَلْیَاْتُوا بِحَدِیْثٍ مِّثْلِہٖ اِِنْ کَانُوْا صَادِقِیْنَ﴾ (الطور:۳۳۔۳۴)