حدیث کا شرعی مقام جلد اول

کے بعض الفاظ میں تھا، کیونکہ دنیا کی کوئی بھی زبان ایسی نہیں رہی ہے جو علاقوں ، خطوں اور قبیلوں کے اعتبار سے الف سے یا تک مختلف رہی ہو۔ لیکن بعد میں مسلمان ہونے والے شامیوں اور عراقیوں کو قرأتوں کے ان اختلافات کا علم نہیں تھا، جس کی وجہ سے وہ ایک دوسرے کی تکفیر کرنے لگے تھے، یہ ایک بہت بڑا فتنہ تھا جس کا گلا پہلے ہی دن گھونٹ دینا ضروری تھا اور عثمان رضی اللہ عنہ نے خلیفہ راشد کی حیثیت سے قریش کے لہجے میں قرآن کا نسخہ تیار کر کے اور دوسرے تمام لہجات کو کالعدم کرکے صرف لہجۂ قریش میں قرآن کی تلاوت کا لوگوں کو پابند بنا کر اس فتنہ کا گلا ہمیشہ کے لیے گھونٹ دیا۔[1] جبریل علیہ السلام جس طرح رسول اللہ صلی اللہ علیہ وسلم پر قرآن کو نازل کرنے کے مکلف بنائے گئے تھے، اسی طرح ان کو اللہ تعالیٰ نے یہ ذمہ داری بھی سونپی تھی کہ وہ ہر سال نبی صلی اللہ علیہ وسلم پر نازل ہونے والے اجزاء کو آپ سے سنیں اور انہیں آپ کو سنائیں بھی، احادیث میں اس کے لیے عرض، معارضہ اور مدارسہ کے الفاظ آئے ہیں ۔ اس حکم الٰہی کی تعمیل میں جبریل علیہ السلام ہر سال رمضان المبارک میں نبی کریم صلی اللہ علیہ وسلم کی خدمت میں حاضر ہوتے اور اس سال نازل ہونے والی آیتوں اور سورتوں کو آپ سے سنتے اور انہیں آپ کو سناتے، یہ سلسلہ پورے ۲۳ سال جاری رہا اور عمر مبارک کے آخری سال کے رمضان المبارک میں انہوں نے نبی کریم صلی اللہ علیہ وسلم سے پورا قرآن جو سوائے سورۂ نصر اور بعض سورتوں کی بعض آیتوں کے نازل ہو چکا تھا، دوبار سنا اور دو بار آپ کو سنایا۔[2] مصحف شریف میں درج تمام سورتوں کی آیتیں از اول تا آخر من جانب اللہ مرتب ہیں ، لیکن سورتوں کی ترتیب اجتہادی ہے اور مصحف صدیقی تیار کرتے وقت یہ ترتیب عمل میں لائی گئی ہے، لیکن چونکہ یہ عمل ایک خلیفۂ راشد کے حکم سے اور اس کے عہد خلافت میں انجام دیا گیا اور تمام صحابۂ کرام نے متفقہ طور پر اسے قبول کیا، اس لیے سورتوں کی جو ترتیب موجودہ مصحف عثمانی میں موجود ہے وہ حجت ہے، میں نے یہاں ’’اجماع‘‘ کا لفظ قصداً استعمال نہیں کیا ہے، کیونکہ بعض صحابۂ کرام نے ذاتی طور پر جو مصحف لکھ رکھا تھا اس میں سورتوں کی ترتیب وہ نہیں تھی جو مصحف عثمانی میں ہے، اسی وجہ سے نماز میں سورتوں کی تلاوت ترتیب سے واجب نہیں ہے یا اس کے وجوب میں اختلاف ہے۔[3]بہرحال یہ میرا موضوع بحث نہیں ہے، میرا موضوع یہ ہے کہ قرآن کے جستہ جستہ اور تھوڑا تھوڑا نازل ہونے کی وجہ سے نہ اس کی آیتیں ترتیب کے ساتھ لکھی جا سکتی تھیں اور نہ سورتیں ، بلکہ جو کچھ نازل ہوتا تھا وہ اسی نزولی شکل میں لکھ کر محفوظ کر لیا جاتا تھا۔ اب جہاں تک مصحف صدیقی میں سورتوں اور آیتوں کی ترتیب کا مسئلہ ہے تو سورتیں بھی مرتب ہیں اور آیتیں بھی:

[1] بخاری ۲۹۸۷، فتح الباری ص ۲۱۹۷۔ ۲۱۹۸ ج۲ [2] بخاری ۳۶۲۴، ۴۹۹۸، ۴۹۹۹، مسلم ۲۳۰۸ [3] فتح الباری ص ۲۲۰۶ ج۲۔ البرھان فی علوم القرآن ص ۱۸۴۔ ۱۸۵ ج۱، الاتقان ص ۲۲۰ ج۱۔