حدیث کا شرعی مقام جلد اول

سیّد رشید رضا کی عبارت اور اس پر شیخ غزالی کے زہر آلود تبصرے میں چند نہایت گمراہ کن باتیں آگئی ہیں جن کو مختلف عنوانوں کے تحت بیان کرنے کی ضرورت ہے۔ حقیقت اور تمثیل: سید رشید رضا نے پیدائش کے موقع پر انسانی بچوں کو شیطان کے چھونے والی حدیث کے بارے میں محمد عبدہ کا جو یہ قول نقل کیا ہے کہ’’اگر یہ حدیث صحیح ہے تو یہ تمثیل ہے حقیقت نہیں اور شاید بیضاوی کا بھی یہی خیال ہے، اس قول پرمیرا تبصرہ یہ ہے کہ یہ حدیث یقینا صحیح ہے اور اس میں امر واقعہ اور حقیقت ہی بیان کی گئی ہے اور یہ تمثیل نہیں ہے شیخ محمد عبدہ نے جو کچھ فرمایا ہے اور ان سے پہلے ناصرالدین ابو الخیر عبداللہ بن عمربیضاوی متوفی ۶۹۱ء نے اپنی تفسیر: ’’انوار التنزیل واسرار التاویل ‘‘ میں اللہ تعالیٰ کے ارشاد: ﴿اَلَّذِیْنَ یَاْکُلُوْنَ الرِّبٰوا لَا یَقُوْمُوْنَ اِلَّا کَمَا یَقُوْمُ الَّذِیْ یَتَخَبَّطُہُ الشَّیْطٰنُ مِنَ الْمَسِّ﴾ (البقرہ: ۲۷۵) ’’جو لوگ سود کھاتے ہیں وہ نہیں کھڑے ہوں گے، مگر جیسے وہ شخص کھڑا ہوتا ہے جس کو شیطان نے چھو کر باؤلا بنا دیا ہو۔‘‘ کی تفسیر کرتے ہوئے جو دعویٰ کیا ہے وہ دراصل معتزلہ اور متکلمین سے مأخوذ ہے، تفسیر بیضاوی در حقیقت جار اللہ زمخشری معتزلی متوفی ۵۳۸ھ کی تفسیر: الکشاف کا خلاصہ ہے، میں گزشتہ صفحات میں دلائل سے یہ واضح کرچکا ہوں کہ متکلمین۔ اشاعرہ اور ماتریدی۔ اگرچہ معتزلہ کے مخالفین کے طور پر ابھرے تھے، لیکن عقائد اور حدیث کی شرعی حیثیت کے بارے میں ان کا نقطۂ نظر معتزلہ کے نقطۂ نظر سے مختلف نہیں ہے، بیضاوی اگرچہ شافعی المسلک متکلم یعنی اشعری تھے مگر اس آیت کی تفسیر میں انہوں نے زمخشری کا قول جوں کا توں نقل کردیا ہے اور زمخشری کا دعویٰ ہے کہ ارشاد باری تعالیٰ: ﴿یَتَخَبَّطُہُ الشَّیْطٰنُ مِنَ الْمَسِّ﴾حقیقت کا بیان نہیں ، بلکہ عربوں کے وہم خیال کا ترجمان ہے۔[1] یہاں موقع کی مناسبت سے عرض کردوں کہ برصغیرکے عقیلت پسندوں کے افکار و خیالات بھی بڑی حدتک معتزلہ کے افکارو خیالات سے ہم آھنگ ہیں ،مشہور صوفی ادیب و مصنف عبدالماجد دریا آبادی الحاد کی تاریکی سے نکل کر تصوف کی گود میں چلے گئے تھے اور مولانا تھانوی کے زیر تربیت رہ کر بہت بڑے صوفی بن گئے تھے بایں ہمہ انہوں نے اپنے پیرو مرشد کے برعکس ’’مس الشیطان ‘‘ کو عربی محاورہ قرار دیا ہے اور یہ دعویٰ کیا ہے کہ سورۂ بقرہ کی مذکورہ آیت میں ’’تخبط ‘‘ کو عرب مخاطبین کے اعتفاد کے مطابق شیطان کی طرف منسوب کردیا گیا ہے،پھر اپنے اس دعویٰ کی تائید میں معتزلہ اور قفال شافعی اور زمخشری اور راغب اشعری کے اقوال نقل کردیے ہیں ۔[2]

[1] ص ۵۰۵ ج۱ [2] تفسیر ماجدی ص ۵۰۴ ج ۲