کتاب: فتاویٰ ثنائیہ مدنیہ(جلد3) - صفحہ 73
کے فتاویٰ اور تحقیقی مقالات بھی جہاں تک مل سکے یا مرتب ہو سکے ، دو جلدوں میں شائع ہو گئے ہیں، باقی کی تلاش اور ترتیب کا کام جاری ہے۔ اللہ کرے وہ بھی جلد منظر عام پر آجائیں تاکہ یہ بیش قیمت علمی ورثہ بھی محفوظ ہو جائے۔ اسی طرح استاذ الاساتذہ حضرت حافظ عبداللہ غازی پوری رحمۃ اللہ علیہ کے فتووں کا ایک مجموعہ مولانا عبدالرحمن مبارکپوری نے جمع و مرتب کیا تھا لیکن ابھی تک غیر مطبوعہ تھا، الحمد للہ وہ بھی پوری ایک صدی کے بعد زیور طباعت سے آراستہ ہو کر منظر عام پر آگیا ہے۔ مولانا عبدالرحمن مبارکپوری صاحب ِ ’’تحفۃ الاحوذی‘‘ کا مجموعۂ فتاویٰ بھی الحمد للہ ایک عرصہ دراز کے بعد تحقیق و تخریج کے ساتھ شائع ہو گیا ہے۔ اور عنقریب ’’فتاویٰ غزنویہ‘‘ بھی ان شاء اللہ منظر عام پر آنے والا ہے جس میں حضرت الامام مولانا عبدالجبار غزنوی اور ان کے دو صاحبزادگان گرامی قدر مولانا سید محمد داؤد غزنوی اور مولانا عبدالواحد غزنوی رحمۃ اللہ علیہم کے فتاوے ہوں گے پہلے فتاویٰ غزنویہ ایک مختصر سی جلد میں شائع ہوئے تھے جس میں صرف مولانا عبدالجبار غزنوی کے فتاوے تھے،اب وہ بالکل نایاب ہے ۔ اب یہ ایڈیشن تین غزنوی اکابر کے فتوؤں کا مجموعہ ہوگا۔ اسی طرح’’مقالات و فتاویٰ مولانا شمس الحق ڈیانوی‘‘ بھی یکجا شائع ہو ئے ہیں۔ فلله الحمد۔
اور یہ مآثر سلف کے پروانے اور ان کے احیاء کے لیے دیوانے شیخ خالد المطیری اور شیخ عارف جاوید محمدی الکویت اور ان کے معاون خصوصی حافظ شاہد محمود (گوجرانوالہ) اور ان کے رفقائے کار کی مساعیٔ حسنہ کا نتیجہ ہے۔ تقبل اللّٰه جهودهم۔
اسی طرح شیخ الحدیث حافظ عبدالمنان نوری پوری رحمۃ اللہ علیہ (متوفی3ربیع الثانی1433ھ بمطابق 26فروری2012) ہیں، ان کے فتاوی’’احکام و مسائل‘‘ کے عنوان سے ان کی زندگی میں دو ضخیم جلدوں میں شائع ہو ئے تھے، مزید دو جلدوں کا مواد جمع و ترتیب کے مراحل میں تھا جو ناشر کی سستی یا عدم توجہی کی وجہ سے تاحال شائع نہیں ہو سکے۔ حالانکہ وہ بھی ان کی زندگی ہی میں شائع ہو سکتے تھے۔ بہرحال ما شاءَ اللّٰه كانَ وما لمْ يشأْ لمْ يكنْ یہ فتاوے بھی بڑی اہمیت کے حامل، حافظ صاحب رحمۃ اللہ علیہ کے علوم قرآن وحدیث کے گہرے مطالعے اور استحضار کے مظہر اور مجتہدانہ بصیرت کے غماز ہیں۔ ناشر اور مرتب کو اللہ تعالیٰ توفیق دے کہ وہ اس علمی سرمایے کو جلد از جلد منظر عام پر لا سکیں، یا ان کی اشاعت کسی اور ادارے کے سپرد کردیں۔
مولانا حافظ عبدالستار الحماد حفظہ اللہ شیخ الحدیث ، شارح صحیح بخاری(اردو) ان کے فتاوے سالہا سال سے مرکزی جمعیت اہل حدیث کے ترجمان ہفت روزہ اہل حدیث لاہور میں شائع ہوتے آرہے ہیں۔ یہ فتاوے بھی اور صاحب فتویٰ بھی ان تمام مذکورہ خوبیوں اور اعلیٰ علمی صلاحیتوں کے حامل ہیں جو مذکورہ علمائے اہل حدیث کا امتیاز رہے ہیں۔ ان کے مطبوعہ فتاوے’’فتاویٰ اصحاب الحدیث‘‘ کے نام سے چار جلدوںمیں مکتبہ اسلامیہ لاہور کے زیر اہتمام شائع ہو چکے