فقہ الصلاۃ (نماز نبوی مدلل)(جلد1)

نہیں ہے اور نہ یہ آیت ان کی دلیل بن سکتی ہے۔ اس مسئلے میں علامہ ابن حزم رحمہ اللہ کا رجحان شافعیہ کی طرح نقض کی طرف ہے اور ’’المحلّیٰ‘‘ میں انھوں نے بڑے زور و شور سے اس بات کو ثابت بھی کیا ہے۔[1] لیکن پوری تفصیل میں جانے کے بعد معلوم ہوتا ہے کہ اس مسئلے میں احناف والا مسلک ہی راجح ہے۔ بدایۃ المجتہد: فقہ مقارن کی مشہور و معتبر کتاب ’’بدایۃ المجتہد‘‘ میں علامہ ابن رشد کا کہنا ہے کہ لمس کی دلالت اگرچہ دونوں معنوں یعنی محض چھونے اور جماع کرنے ہر دو کے لیے برابر کے قریب ہے،لیکن میرے نزدیک زیادہ ظاہر دلالت جماع کے لیے ہے،اگرچہ یہ مجازی معنیٰ ہے،کیوں کہ اللہ تعالیٰ نے مباشرت اور مس کے الفاظ کے ساتھ ہی جماع سے کنایہ کیا ہے۔مذکورہ آیت کی اس تفسیر سے وہ تعارض و اختلاف بھی ختم ہو جاتا ہے،جو اس آیت کی دوسری تفسیر اور احادیث میں پیدا ہوتا نظر آتا ہے۔ اپنی اس رائے کو ذکر نے سے پہلے علامہ ابن رشد نے مذکورہ مسئلے میں ائمہ و فقہا کے مختلف اقوال ذکر کرنے کے بعد اس بات کی وضاحت بھی کی ہے کہ ان کے اختلاف کا سبب کلامِ عرب میں لفظِ لمس کا دونوں معنوں کے مابین مشترک ہونا ہے،کیوں کہ اہلِ عرب اس لفظ کو کبھی تو محض ہاتھ سے چھونے کے لیے استعمال کرتے ہیں اور کبھی اس لفظ سے جماع کے لیے کنایہ کرتے ہیں۔ آگے بھی علامہ موصوف نے اس موضوع پر بڑی عمدہ بحث کی ہے،جسے۔مؤسسۃ الناصر للثقافۃ۔کی چار الگ الگ چھوٹے سائز کے چار اجزا والی کتاب ’’بدایۃ المجتہد‘‘ کے(1/ 54،55،56) پر یا پھر دو جلدوں پر مشتمل دار المعرفہ بیروت والی معروف طباعت(1/ 37،38،39) میں دیکھا جاسکتا ہے،مختصر یہ کہ علامہ ابن رشد نے بھی عورت کو چھونے سے وضو نہ ٹوٹنے ہی کو ترجیح دی ہے۔ قائلینِ نقض کی دوسری دلیل: جن ائمہ و فقہا نے کہا ہے کہ عورت کو محض چھونے سے بھی وضو ٹوٹ جاتا ہے،ان کا استدلال بعض احادیث سے بھی ہے،مگر جس طرح ان کے اس مذکورہ آیت سے استدلال کرنے کی پوزیشن ہے،

[1] المحلّی(1/ 1/ 244،249) طبع المکتب التجاری،بیروت