فکر فراہی اور اس کے گمراہ کن اثرات

چوتھا اصول: حدیث سےقرآن کاکوئی حکم منسوخ نہیں ہوسکتا یہ فراہی صاحب کاتفسیر قرآن کاچوتھااصول ہے۔ [1] یہ وہ بنیادی اختلاف ہے جومفسرین امت اورفراہی گروہ کے درمیان ہے۔ تمام امت کے مفسرین علماء وفقہاء اورمحدثین عظام اس بات کے قائل ہیں کہ رسول اللہ صلی اللہ علیہ وسلم نےجس طرح قرآن کریم کے مجمل احکام کی تفصیل وتوضیح کی ہےجس کی بنیادپرہی امت قرآن کے ان اجمالی احکامات پرعمل کرتی آرہی ہے اورآج بھی کررہی ہے (جیسے نماز، زکوٰۃ، حج وعمرہ وغیرہ کے احکام ہیں) اسی طرح قرآن کے عمومی احکامات میں رسول اللہ صلی اللہ علیہ وسلم نےتخصیص بھی فرمائی ہے اورآپ کایہ وہ منصب ہے جو خود اللہ تعالیٰ نے﴿وَأَنْزَلْنَا إِلَيْكَ الذِّكْرَ لِتُبَيِّنَ لِلنَّاسِ مَا نُزِّلَ إِلَيْهِمْ﴾ میں آپ کوعطافرمایاہے۔ اس کےتحت آپ نےقرآن میں بیان کردہ ’’السارق“(چور)کےعموم میں تخصیص فرمائی کہ چوروہ ہے جوایک رُبع دیناریااس سےزیادہ ررقم کی چوری کرے۔ اس سے کم رقم یامالیت کی چوری کرنےوالاچور شمارنہیں ہوگا۔ اسی طرح سورۂ نور کی آیت، جس میں حدّزنا سوکوڑے کابیان ہے، اس کےعموم میں آپ صلی اللہ علیہ وسلم نے تخصیص فرمائی کہ یہ حدہرقسم کے زانیوں کی نہیں ہے بلکہ صرف غیرشادی شدہ زانی کی ہے۔ اور شادی شدہ زانی کی سزارجم ہے۔ یہ تخصیص آپ نے اپنے عمل سے بھی فرمائی اوراپنے فرامین کے ذریعےسے بھی۔ فراہی گروہ اپنے امام سمیت یہ مغالطہ دیتاہے کہ یہ قرآن کانسخ ہے جس کاحق رسول اللہ صلی اللہ علیہ وسلم کوبھی نہیں ہے، حالانکہ یہ قرآن کانسخ نہیں ہے، قرآن کےعموم کی تخصیص ہے، اگرچہ بعض متقدمین نےاس کے لیے نسخ کا لفظ استعمال کیاہے، لیکن مرادان کی بھی اس سے تخصیص ہی ہے نہ کہ اصطلاحی نسخ۔ بہرحال یہ اصو ل بھی واضح طورپرانکارحدیث ہی کامظہرہے، اسی اصول پریہ گروہ اپنےامام سمیت احادیث رجم کامنکر ہے جس پرگزشتہ صفحات میں متعدد جگہ تفصیلی گفتگوہوچکی ہے۔

[1] مقدمہ نظام القرآن، تفسیرکےخبری ماخذ، ص:39۔