فکر فراہی اور اس کے گمراہ کن اثرات

لکھاہے: ”ان کےذہن وفکرپرسرسیدکاجادوچل چکاتھاوہ غیراختیاری طورپرمسمریزم کے معمول کی طرح اسی راہ پرچلتے رہے جس پرسرسید کے سحرنے ان کوڈال دیاتھایہاں تک کہ خود ان کو اپنی اثرپذیری کا احساس تک نہ تھا“۔ مزیدلکھتےہیں: ”سرسیداحادیث کوقابل حجت نہیں سمجھتےتھے اور اپنی تفسیر میں بائبل پرتواعتماد کرسکتےتھےلیکن روایات حدیث پراعتماد نہیں کرتےتھے، مولانافراہی سرسید کی بعض باتوں پرتنقیدتوکرتےتھے مگران سےمتأثرہوئے بغیرنہ رہ سکے۔ تفسیرقرآن میں احادیث وروایات سے اجتناب واحتراز سرسید ہی کے دربارکاعطیہ ہے جب کہ سرسید کے رویے کے پس پردہ وہی انکارحدیث کا جذبہ کارفرماہے۔ جاہلی ادب سے استناد، تفسیربالرائےاور ذاتی ذہانت وفطانت کی مشعل ہاتھ میں لے کرخود ساختہ توجیہ وتاویل کرنا، قدیم مفسرین کااستخفاف، جگہ جگہ بائبل کے حوالےدینا، فہمِ قرآن میں صحیح احادیث کوترک کرکے تورات کوبطور شہادت پیش کرنا، یہ ساری باتیں سرسید ہی کے دربارسے ان کوحاصل ہوئیں۔ بہت ممکن ہے فکرفراہی میں احادیث کی استنادی حیثیت بھی مشکوک ہومگریہ بات قطعیت کے ساتھ ثابت نہیں کیونکہ مولانا فراہی نے بہت کم لکھاہےاور اس سلسلےمیں کوئی تصریح نہیں ملتی اس لیے اس نقطۂ نگاہ کی کوئی واضح تصویرہمارےسامنے نہیں آئی۔ البتہ ان کے خصوصی شاگردجوفکرفراہی کےوارث و امین ہیں انہوں نے بہت کچھ لکھاہے اور اسلامیات کے مختلف پہلوؤں پرلکھاہے، اگریہ سب کچھ فکرفراہی کی روشنی میں لکھاہے توفکرفراہی کی صحیح تصویرہمارےسامنےآجائےگی۔ ہمارایہ سوچنااس لیے درست ہے کہ اس مکتبۂ فکر کاہرشخص مدعی ہے کہ مولانا اصلاحی، مولانافراہی کے نقطۂ نگاہ، نظریات وخیالات کےسچے اور صحیح معنی میں وارث ہیں، اس لیے کہاجاسکتاہے کہ مولانااصلاحی کی تحریریں فکرفراہی کی آئینہ دارہیں اور اس آئینے میں فکرفراہی کی بہت واضح تصویراپنے تمام خدوخال کے ساتھ نظرآجائے گی۔ ہم اس نقطۂ نگاہ سے مولاناامین احسن اصلاحی کے مضامین، مختلف موضوعات پرلکھی گئی کتابوں کاجائزہ لیتےہیں تاکہ فکرفراہی کی اصلی تصویرہمارے سامنےآجائے۔