فکر فراہی اور اس کے گمراہ کن اثرات

3۔ حدیث جیساکہ مذکورہواہے کہ علامہ فراہی کے نزدیک قرآن حکیم کی تفسیرمیں اصل حیثیت خود قرآن کوحاصل ہے، احادیث وغیرہ کومحض تائید اورتصدیق کےلیےتابع کی حیثیت سے نقل کرتےہیں چنانچہ وہ کہتےہیں کہ: ’’ میں یہ یقین رکھنےکے باوجود کہ صحیح حدیثیں کبھی قرآن کے مخالف نہیں ہوسکتی ہیں پہلے آیات کی تفسیرآیات کی روشنی میں کرتاہوں اوراحادیث کاتذکرہ تابع کی حیثیت سے کرتاہوں۔ ‘‘[1] وہ یہ بھی کہتےہیں کہ : ’’بہت سی روایتیں بظاہرقرآن کے خلاف ہوتی ہیں مگرقرآن کی روشنی میں اس کی تاویل کی جائے تووہ بالکل قرآن کے مطابق ہوجاتی ہیں کیونکہ قرآن کی حیثیت ایک مرکز کی ہے اورتمام حدیثیں مختلف جہتوں سےاس کی طرف لوٹتی ہیں۔ ‘‘ علامہ فراہی کےاس خیال سے کون انکارکرسکتاہے کہ صحیح حدیث قرآن کے مخالف نہیں ہوسکتی ہے اورجوحدیث بظاہرقرآن کےخلاف معلوم ہو اس کی تاویل اورتوجیہ کرکے قرآن کے موافق کرناچاہیے، البتہ یہ ہوسکتاہے کہ کسی آیت سےاخذکیاہوامفہوم کسی صحیح حدیث کے خلاف ہو، ایسی صورت میں حدیث قرآن کے خلاف نہیں ہوتی ہے۔ بلکہ ذہنی اپج کےمخالف ہوتی ہے، اس حالت میں طریق واضح یہ ہے کہ حدیث کواختیار کیاجائے، اورعقلی مفہوم سے گریز، یہ بڑی جرأت کی بات ہوگی اپنے پندارعلم کے سامنےکسی صحیح حدیث کورد کردیاجائے جسے جمہورامت نےاخذ وقبول کی سند عطاکی ہو، اوراسے معتبراور مستند قرار دیاہو۔ افسوس کہ علامہ فراہی کےیہاں اس طرح کی متعدد مثالیں ملتی ہیں جن میں انہوں نےخود اخذکردہ مفہوم کے بالمقابل صحیح احادیث کوردکردیاہے اوربعض ایسی حدیثوں سے انکارکیاہے جس کی تاویل ہوسکتی ہے، چنانچہ لکھتےہیں: ’’.....اورسب سے زیادہ تعجب ان لوگوں پرہے جوایسی روایتوں کوقبول کرلیتےہیں جونصوص قرآن کی تکذیب کرتی ہیں مثلاً حضرت ابراہیم علیہ السلام کےجھوٹ بولنے کی روایت۔ ‘‘ [2]

[1] نظام القرآن:9 [2] نظام القرآن، ص: 39۔