دعوت دین کے بنیادی اصول

7… سوتے وقت ان کاموں کا اہتمام ٭…سیدنا عبداللہ بن سرجس رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ((إِذَا نِمْتُمْ فَأَطْفِؤا السِّرَاجَ، فَإِنَّ الْفَأْرَۃَ تَأْخُذُ الْفَتِیلَۃَ فَتَحْرِقُ أَہْلَ الْبَیْتِ، وَأَوْکِؤا الْأَسْقِیَۃَ، وَخَمِّرُوا الشَّرَابَ، وَغَلِّقُوا الْأَبْوَابَ بِاللَّیْلِ)) [1] ’’جب تم سونے لگو تو چراغ بجھا دیا کرو، کیونکہ چوہیا چراغ کی بتّی کو پکڑ کر گھر والوں کو جلا دیتی ہے، مشکیزوں کے منہ باندھ دیا کرو، پانی کے برتن ڈھانپ دیا کرو اور رات کو دروازے بند کر دیا کرو۔‘‘ ٭…سیدنا ابن عمر رضی اللہ عنہما بیان کرتے ہیں کہ نبی صلی اللہ علیہ وسلم نے فرمایا: ((لاَ تَتْرُکُوا النَّارَ فِی بُیُوتِکُمْ حِینَ تَنَامُونَ)) [2] ’’جب تم سونے لگو تو اپنے گھروں میں آگ (جلتی ہوئی) نہ چھوڑا کرو۔‘‘ ٭…سیدنا ابن عباس رضی اللہ عنہما بیان کرتے ہیں کہ ایک چوہیاآئی اورچراغ کی بتّی پکڑ کر اسے گھسیٹنے لگی، ایک بچی اسے بھگانے لگ گئی تورسول اللہ صلی اللہ علیہ وسلم نے فرمایا: اسے چھوڑدو۔ پھر اس (چوہیا) نے وہ بتّی لا کر اس چٹائی پر پھینک دی، جس پر آپ صلی اللہ علیہ وسلم بیٹھے ہوئے تھے، اس بتّی نے ایک درہم کی جگہ کے بقدر چٹائی جلا دی، تو رسول اللہ صلی اللہ علیہ وسلم نے فرمایا: ((إِذَا نِمْتُمْ فَأَطْفِؤا سُرُجَکُمْ، فَإِنَّ الشَّیْطَانَ یَدُلُّ مِثْلَ ہٰذِہٖ عَلٰی ہٰذَا فَیُحْرِقُکُمْ)) [3] ’’جب تم سونے لگو تو اپنے چراغوں کو بجھا دیا کرو، کیونکہ شیطان اس جیسے جانوروں کی ایسے کاموں میں راہنمائی کرتاہے اورتمہارے گھروں کو جلادیتا ہے۔‘‘

[1] مسند أحمد: ۲۰۷۷۵۔ صحیح الجامع: ۸۱۵. [2] صحیح البخاری: ۶۲۹۳۔ صحیح مسلم: ۲۰۱۵. [3] سنن أبی داود: ۵۲۴۷۔ صحیح الجامع: ۸۱۶۔ سلسلۃ الأحادیث الصحیحۃ: ۱۴۲۱.