دبستان نذیریہ

کے ایک دوست مولانا حکیم محمد محسن سملوی، مولانا امرتسری کو لکھتے ہیں : ’’ مولانا شاہ عین الحق صاحب میرے پھوپھا مولانا شاہ علی نعمت کے شاگرد تھے۔ شاہ عین الحق صاحب کا مکان میرے مکان سے چند فرلانگ پر ہے اور مجھ سے غایت دوستی تھی۔ اخیر میں مدرسہ احمدیہ آرہ میں وہ مدرس اوّل تھے۔ محض حدیث پڑھاتے تھے۔ اپنے مواعظ میں اہلِ قرآن کا رد کیا کرتے تھے۔ حدیث کو ستونِ دین فرمایا کرتے تھے۔‘‘[1] چند برس پیشتر دار التذکیر لاہور سے بھی ’’شرعۃ الحق‘‘ کی ایک طباعت ہوئی، اس میں کتاب کے جدید مقدمہ نگار نے انہی دعاوی کو دہرایا ہے جس کی حقیقت واضح کر دی گئی ہے۔ تدریس: مولانا شاہ عین الحق نے مختلف اوقات میں تدریس کی ذمے داریاں نبھائیں ۔ استاذ الاساتذہ حافظ عبد اللہ غازی پوری جب ’’مدرسہ احمدیہ‘‘ آرہ سے دہلی تشریف لے گئے تو مولانا بحسبِ خواہش علامہ عبد العزیز رحیم آبادی ’’مدرسہ احمدیہ‘‘ آرہ کے شیخ الحدیث مقرر ہوئے۔ مولانا ثناء اللہ امرتسری ’’مدرسہ احمدیہ آرہ کو مبارک‘‘ کے عنوان سے لکھتے ہیں : ’’تمام بہی خواہانِ مدرسہ احمدیہ آرہ کو جناب مولانا حافظ عبد اللہ صاحب غازی پوری کی علیحدگی سے جو صدمہ ہوا تھا، وہ اس خبر کے سننے سے کسی قدر تخفیف پذیر ہو جائے گا کہ جماعت اہلِ حدیث کے ابراہیم ادھم یعنی جناب مولانا شاہ محمد عین الحق صاحب سابق سجادہ نشیں پھلواری مدرسہ موصوفہ کی خدماتِ اوّل مدرسی منظور فرما کر مشغول کار ہو گئے ہیں ۔ یہی صاحب ہیں جن کا نام نامی میں نے جناب حافظ عبد اللہ صاحب کی خدمت میں بغرضِ منظوری پیش کیا تھا اور صاحبِ ممدوح نے آپ کو اس خدمت کے قابل فرمایا تھا۔ (ہفت روزہ) ’’اہلِ حدیث‘‘ کی طرف سے مدرسہ کو مبارک۔ خداوندِ کریم شاہ صاحب کو ہمتِ وافر عطا فرما دے۔ آمین‘‘[2]

[1] ہفت روزہ ’’اہلِ حدیث‘‘ (امرتسر) ۱۷ ستمبر ۱۹۳۷ء [2] ہفت روزہ ’’اہلِ حدیث (امرتسر) ۲۹ جنوری ۱۹۰۹ء