چند بدعات اور ان کا تعارف

کا پیغام سنا رہے ہیں : ؎ بنانا نہ تربت کو میری صنم تم نہ کرنا میری قبر پہ سر کو خم تم نہیں بندہ ہونے میں کچھ مجھ سے کم تم کہ بے چارگی میں برابر ہیں ہم تم مجھے دی ہے اس نے بس اتنی بزرگی کہ بندہ بھی ہوں اس کا اور ایلچی بھی نبی صلی اللہ علیہ وسلم کے اس پیغام سے ثابت ہوتا ہے کہ جب قبرِ نبوی سجدہ گاہ نہیں بن سکتی تو پھر دیگر افراد کی قبریں کس کھاتے میں آسکتی ہیں ؟ (۱۰) قرآن خوانی: یہ بدعت بھی برصغیر میں خوب پھیل گئی ہے۔ بعض نام نہاد موحد بھی اس بدعت میں مبتلا نظر آتے ہیں بلکہ بہت سے اسلام کی نشاۃ ثانیہ کی تحریکیں چلانے کے دعویدار ماڈرن قسم کے مفکر ودانشور بھی قرآن خوانی کی محافل میں سپارے ہاتھ میں لیے ہل ہل کر پڑھتے اور لوگوں کو بخشتے بخشواتے نظر آتے ہیں ۔ علاوہ ازیں کچھ لوگوں نے اس بدعت میں اضافہ کرتے ہوئے ایک نئی صورت نکالی ہے وہ یہ کہ محلّہ محلّہ قرآن خوانی کمیٹیاں بنائی گئی ہیں ۔ ہر ہفتہ یہ لوگ کسی مخصوص دن (عموماََ جمعہ کے دن) برائے حصول خیروبرکت جمع ہو کر قرآن خوانی کرتے ہیں پھر اپنے محلّہ کے مسائل پر گفتگو کرتے اور مباحثے وغیرہ کرتے ہیں ۔ اس طرح یہ محفل اختتام پذیر ہوتی ہے یعنی یہ قرآن مجید کے استعمال کی ایک نئی صورت نکلی ہے۔ جس مقصد عظیم کیلئے حق تعالیٰ نے اس بلندمرتبہ کتاب کو نازل فرمایاہے اسے سورۂ محمد میں اس طرح بیان کیا ہے: {اَفَلَا یَتَدَبَّرُوْنَ الْقُرْآنَ اَمْ عَلٰی قُلُوْبٍ اَقْفَالُھَا} (سورۂ محمد:۲۴) ’’کیاہوا ان لوگوں کو کہ قرآن مجید میں غور وفکر نہیں کرتے کیا ان کے دلوں پر تالے لگے ہوئے ہیں ؟‘‘۔