برھان التفاسیر لإصلاح سلطان التفاسیر

قرآن، حدیث یا دیگر علوم پڑھیں تاہم وہ بھولے ہوئے ہیں۔ اے خدا! ہماری یہ دعا اور التجا قبول فرما۔‘‘ سورۂ فاتحہ کی تفسیر مع جواب ختم ہوئی۔ الحمد للہ۔ آج سورہ بقرہ کی تفسیر اور تنقید شروع ہوتی ہے۔ نوٹ: ہم نے ارادہ کیا ہے کہ اس سلسلہ کو خاص مفید صورت میں مرتب کریں جو علاوہ ’’جواباتِ نصاریٰ‘‘ کے قرآن فہمی میں بھی ممدو معاون ہو۔ پس ناظرین سنیں اوراپنے حلقہ اثر میں اشاعت کریں۔ فضائلِ سورہ بقرہ: اس سورت کے فضائل حدیثوں میں بہت آئے ہیں۔ 1۔ قال رسول اللّٰه ﷺ: (( لکل شيء سنام، وإن سنام القرآن سورۃ البقرۃ، و فیھا آیۃ ھي سیدۃ آي القرآن، ھي آیۃ الکرسي ))[1] ’’آنحضرت صلی اللہ علیہ وسلم نے فرمایا ہے کہ ہر چیز کا کوہان ہوتا ہے، قرآن شریف کا کوہان سورہ بقرہ ہے۔ اس میں ایک آیت ہے جو آیات قرآنیہ کی سردار ہے، اُس کا نام آیۃ الکرسی ہے۔‘‘ 2۔ إن رسول اللّٰه ﷺ قال: (( لا تجعلوا بیوتکم قبورا، فإن البیت الذي تقرأ فیہ سورۃ البقرۃ لا یدخلہ الشیطان ))[2]

[1] سنن الترمذي، رقم الحدیث (2878) امام ترمذی رحمۃ اللہ علیہ فرماتے ہیں: ’’ھذا حدیث غریب، لا نعرفہ إلا من حدیث حکیم بن جبیر، وقد تکلم شعبۃ في حکیم بن جبیر وضعفہ‘‘ لیکن حضرت عبداﷲ بن مسعود رضی اللہ عنہما سے ایک اور روایت حسن سند کے ساتھ بایں الفاظ مروی ہے: ’’إن لکل شيء سناما وإن سنام القرآن سورۃ البقرۃ‘‘ (سنن الدارمي: 2/ 539، المستدرک للحاکم: 1/ 748) [2] صحیح مسلم، رقم الحدیث (780) سنن الترمذي، رقم الحدیث (2877)