برصغیر میں اہل حدیث کی اولیات

سوار ہوئے جو بحری جہاز تھااورچونتیس دن کے بعد 11۔جنوری 1865ء کو پورٹ بلئیر (جزیرۂ انڈمان) میں اترے۔ اس سے کچھ عرصہ بعد مولانا عبدالرحیم کو انبالہ جیل سے نکالا گیا، وہ بیمار تھے۔ لاہور پہنچے تو ایک سال آٹھ مہینے لاہور سنٹرل جیل میں رہے۔ اس کے بعد ملتان، کوٹری، کراچی اور بمبئی کے راستے کالا پانی پہنچے۔ ان کا یہ سفر نہایت اذیت ناک تھا۔ اس کی ایک وجہ تو یہ تھی کہ یہ خود بیمار تھے۔ دوسری وجہ یہ ہوئی کہ جس جہاز میں یہ سوار تھے، اس کے تمام مسافر مختلف امراض میں مبتلا ہوگئے تھے۔ اس کے علاوہ سمندر میں طوفان آگیا، جس کے باعث جہاز تیئیس (23) دن کے بجاے ایک مہینا اکیس دن میں پورٹ بلئیر پہنچا۔ 2۔ عظیم آباد کا پہلا مقدمۂ بغاوت مولانا یحییٰ علی وغیرہ کے مقدمے کا فیصلہ ہوجانے کے بعد جو دراصل پہلا مقدمۂ بغاوت تھا، عظیم آباد (پٹنہ) میں مولانا احمد اللہ پر مقدمہ قائم کیا گیا۔ یہ ترتیب کے اعتبار سے دوسرا مقدمۂ بغاوت تھا۔ لیکن عظیم آباد (پٹنہ) کے دو مقدموں میں سے پہلا تھا۔ مولانا احمد اللہ اپنے علم وفضل، زہد و عبادت اورفہم وتدبر کی بنا پر عظیم آباد اور اس کے گردونواح میں نہایت اعزاز واحترام کے مالک تھے۔ مولانا یحییٰ علی کے بڑے بھائی تھے۔ اپنے علاقے کے رئیس تھے۔ مولوی الٰہی بخش جعفری کے فرزند تھے۔ 1223ھ (1808ء) میں پیدا ہوئے، والد نے احمد بخش نام رکھا تھا، سید احمد شہید سے وابستگی پیدا ہوئی تو انھوں نے احمد اللہ نام رکھا اور پھر اسی نام سے شہرت پائی۔ مولانا ولایت علی عظیم آبادی اور دیگر اساتذہ سے دینی علوم حاصل کیے۔ 1857ء کے ہنگامے میں تقریباً تین مہینے سرکٹ ہاوس میں نظر بند رہے۔