عظمت قرآن : بزبان قرآن

الناس پڑھے گا وہ اسے ہر طرح(کے مصائب و آلام اور رنج و غم)سے محفوظ رکھنے کے لیے کافی ہوجائیں گے۔‘‘ ایسے ہی مسند احمد میں نبی صلی اللہ علیہ وسلم کا ارشادِ مبارک ہے: ‘’جو شخص اللہ تعالیٰ سے(تلاوتِ قرآن اور سماعتِ قرآن کے ذریعے)قرآن مجید کو آنکھوں کا نور اور دل کا سرور بنانے،نیز رنج و غم دور کرنے کی درخواست کرے گا،اللہ اسے آنکھوں کی ٹھنڈک اور دل کا سکون عطا فرمائے گا اور اس کے رنج و غم بھی دور فرمادے گا۔‘‘ غور فرمائیے! قرآنِ مجید کی عمومی تلاوت اور چند مخصوص سورتوں یا آیات کا اہتمام انسان کو کتنے مصائب و آلام،ہموم و غموم اور شرور و فتن سے محفوظ کرکے دنیا میں عزت و آرام اور خیر و برکت کی زندگی سے ہمکنار کردیتا ہے۔حقیقت یہ ہے کہ قرآنِ مجید دنیا کے شرور و فتن اور مصائب و آلام سے محفوظ ترین پناہ گاہ ہے۔کشمکشِ خیر و شر میں مضبوط ترین ڈھال ہے۔زندگی کے تپتے صحراء میں ٹھنڈا اور گھنا سایہ ہے۔جو اسے اپنائے گا سر ا سر رحمت پائے گا اور جو اسے ترک کرے گا یقینا وہ حرماں نصیب اور محرومِ رحمت ہوگا۔