کتاب: اذکار نافعہ - صفحہ 111
(۹)
نبی کریم صلی اللہ علیہ وسلم پر درُود اور اس کے فضائل
ا۔ درُود شریف کی چار اقسام کے الفاظِ مبارکہ:
احادیث شریفہ میں درُود شریف کا ذکر متعدد الفاظ کے ساتھ کیا گیا ہے ۔ ان میں سے چار اقسام کے الفاظِ مبارکہ ذیل میں توفیقِ الٰہی سے پیش کیے جا رہے ہیں:
۱: امام بخاری نے عبدالرحمن بن ابی لیلیٰ سے روایت نقل کی ہے ،کہ انہوں نے بیان کیا ، کہ کعب بن عجرہ رضی اللہ عنہ سے میری ملاقات ہوئی ، تو انہوں نے فرمایا:’’کیا میں تمہیں وہ تحفہ نہ دے دوں ، جو میں نے نبی کریم صلی اللہ علیہ وسلم سے سنا؟‘‘
میں نے عرض کیا:’’جی ہاں، مجھے یہ تحفہ عطا فرمائیے۔‘‘
انہوں نے بیان فرمایا:’’ ہم نے رسو ل اللہ صلی اللہ علیہ وسلم سے پوچھا تھا:’’آپ کے اہل بیت پر درُود کیسے ہے؟ (جبکہ)اللہ تعالیٰ نے ہمیں سلام بھیجنے کا طریقہ تو [خود ہی] سکھا دیا ہے۔‘‘
آنحضرت صلی اللہ علیہ وسلم نے فرمایا: ’’تم کہو:
[اَللَّھُمَّ صَلِّ عَلیٰ مُحَمَّدٍ وَّ عَلیٰ آلِ مُحَمَّدٍ کَمَا صَلَّیْتَ عَلیٰ إِبْرَاہِیْمَ وَ عَلیٰٓ اٰلِ إِبْرَاہِیْمَ۔ إِنَّکَ حَمِیْدٌ مَّجِیْدٌ۔اَللَّھُمَّ بَارِکْ عَلیٰ مُحَمَّدٍ وَّ عَلیٰ اٰلِ مُحَمَّدٍ کَمَا بَارَکْتَ عَلیٰ إِبْرَاہِیْمَ وَ عَلیٰ اٰلِ إِبْرَاہِیْمَ۔ إِنَّکَ حَمِیْدٌ مَّجِیْدٌ۔][1]
[1] [ترجمہ:’’اے اللہ! محمد۔ صلی اللہ علیہ وسلم ۔پر اور محمد۔ صلی اللہ علیہ وسلم ۔ کی آل پر رحمت نازل فرمائیے جس طرح کہ آپ نے ابراہیم۔ علیہ السلام ۔ اور آل ابراہیم۔ علیہ السلام ۔ پر رحمت نازل فرمائی۔ بلاشبہ آپ بہت تعریف والے اور بہت بزرگی والے ہیں۔ اے اللہ! محمد۔ صلی اللہ علیہ وسلم ۔ اور آل محمد۔ صلی اللہ علیہ وسلم ۔پر برکت نازل فرمائیے، جس طرح کہ آپ نے ابراہیم۔ علیہ السلام ۔ اور آل ابراہیم۔ علیہ السلام ۔ پر برکت نازل فرمائی ۔ یقینا آپ بہت تعریف والے اور بڑی بزرگی والے ہیں۔‘‘]
صحیح البخاری،کتاب الأنبیاء،باب ، رقم الحدیث ۳۳۷۰، ۶؍۴۰۸۔