اصول ومبادی پر تحقیقی نظر

ایسی تفسیر جس سے بات کا بتنگڑ بن جائے اور خود انہی کی بات کا رد ہوجائے بے کار اور باطل ہے۔ صحیح بات یہی ہے کہ قرآن اور میزان دو علیحدہ علیحدہ چیزیں ہیں وگرنہ نتائج مذکورہ آپ کے سامنے ہیں ان نتائج کو کوئی ادنیٰ سا مسلمان بھی نہیں مانے گا یہاں تک کہ غامدی صاحب بھی نہیں مانیں گے۔ قرآن کی تحدید وتخصیص اصول غامدی:۔ غامدی صاحب اپنے قواعد وضوابط کی مزید وضاحت کرتے ہوئے لکھتے ہیں : قرآن مجید کی یہ حیثیت،جو اس نے خود اپنے لئے ثابت قرار دی ہے لہٰذا اس کی بنیاد پر جو باتیں قرآن کے بارے میں بطور اصول ماننی چاہئے وہ یہ ہیں۔ پہلی یہ کہ قرآن سے باہر کوئی وحی خفی یا جلی یہاں تک کہ خدا کا پیغمبر بھی جس پر یہ نازل ہوا ہے،اس کے کسی حکم کی تحدید وتخصیص یا اس میں کوئی ترمیم وتغیر نہیں کرسکتا دین میں ہر چیز کے ردوقبول کا فیصلہ اس کی آیات بینات کی روشنی میں ہوگا(اصول ومبادی میزان صفحہ ۲۴) اسی طرح کی بات کو غامدی صاحب نے حدیث اور قرآن کا باب باندھ کر بیان کیا ہے وہ رقمطراز ہیں : چوتھے سوال کا جواب یہ ہے کہ حدیث سے قرآن کے نسخ اور اس کی تحدید وتخصیص کایہ مسئلہ محض سوء فھم اور قلت تدبر کا نتیجہ ہے اسی طرح کا کوئی نسخ یا تحدید وتخصیص سرے سے واقع ہی نہیں ہوئی کہ اس سے قرآن کی یہ حیثیت کہ وہ میزان اور فرقان ہے کسی لحاظ سے مشتبہ قرار پائے(اصول ومبادی میزان ۳۶)