اسماء الحسنیٰ(عثمان صفدر)

6۔القدوس پاک ہر قسم کے عیوب و نقائص سے پاک ۔ کیونکہ وہ جلال اور کمال کی صفات کا حامل ہے۔ قرآن مجید میں یہ نام 2 مرتبہ آیا ہے۔ ﴿ الْمَلِكِ الْقُدُّوْسِ الْعَزِيْزِ الْحَكِيْمِ﴾ وہ بادشاہ ، انتہائی مقدس ، غالب اور حکمت والا ہے۔ (الجمعہ :1) 7۔السلام سلامتی والا وہ ذات جو ذاتی، صفاتی ، عملی کمال کی وجہ سے ہر قسم کے عیوب و نقائص سے سلامتی والا ہے، وہ ساری مخلوقات کو سلامتی عطا فرماتا ہے۔ قرآن مجید میں یہ نام ایک مرتبہ آیا ہے۔ ﴿ اَلْمَلِكُ الْقُدُّوْسُ السَّلٰمُ ﴾)اللہ ہی ) بادشاہ ، انتہائی مقدس ، اور سلامتی والا ہے۔ (الحشر :23) 8۔المؤمن امان دینے والا وہ ذات جو اپنی وحدانیت کے دلائل سے اپنی صداقت بیان کرے، رسولوں اور ان کے پیرو کاروں کی تصدیق کرے، جو اپنے بندوں کو ظلم سے امان دے ، وہ اپنے بندوں کو ایسے احکامات دیتا ہے، جن سے دلی اطمینان اور باہمی محبت وجود میں آتی ہے، وہی لوگوں کو دنیا و آخرت میں پیش آمدہ خوف سے امان دیتا ہے۔ قرآن مجید میں یہ نام ایک بار آیا ہے ۔ ﴿ الْقُدُّوْسُ السَّلٰمُ الْمُؤْمِنُ الْمُهَيْمِنُ الْعَزِيْزُ الْجَبَّارُ الْمُتَكَبِّرُ ﴾ (اللہ) انتہائی مقدس ، سراسر سلامتی ، امان دینے والا ، نگہبان ، سب پر غالب اپنا حکم بزورِ طاقت نافذ کرنے والا ، اور کبریائی والا ہے۔ (الحشر: 23) 9۔المہیمن نگہبان جو اپنی مخلوقات کے افعال،رزق اور زندگی کا بندوبست فرماتا ہے،وہ اپنی مخلوق کے تمام احوال سے واقف ہے ،وہی ان کی حفاظت و نگرانی اورنگہبانی کرتا ہے۔ قرآن مجید میں یہ نام صرف ایک بار آیا ہے۔ ﴿السَّلٰمُ الْمُؤْمِنُ الْمُهَيْمِنُ ﴾ سراسر سلامتی،امن دینےوالا،نگہبان(الحشر:23)