اسماء الحسنیٰ(عثمان صفدر)

56۔المجید بڑا، بزرگ ، بڑی شان والا جو تمام صفاتِ کمال سے متصف ہے، وہ خود بھی عظیم اور اس کے تمام افعال بھی عظیم ، بےحد کرم کرنے والا، ساری مخلوقات اسی کی عظمت کے گن گاتی ہیں ۔ قرآن میں یہ نام 2 مرتبہ آیا ہے۔﴿اِنَّهٗ حَمِيْدٌ مَّجِيْدٌ ﴾ بے شک اللہ نہایت قابلِ تعریف اور بڑی شان بزرگی والا ہے۔ (ہود : 73) 57۔الشھید گواہ وہ جس سے ذرہ برابر بھی کوئی چیز زمین یا آسما ن میں کہیں بھی پوشیدہ نہیں ہے،وہ ہر چیز سے باخبر ہےانہیں دیکھ رہا ہے اور ان کی تمام تفاصیل کا اسے علم ہے۔ قرآن مجید میں یہ نام 18 بار آیا ہے ۔ ﴿وَكَفٰي بِاللّٰهِ شَهِيْدًا ﴾اور اللہ تعالیٰ بطورگواہ کافی ہے۔(النساء:166) 58۔الحق سچا مالک جس کا وجود بر حق ہے ، جو حقیقت میں معبودِ برحق ہے، وہی رب اور بادشاہ ہے۔ اپنے افعال و صفات میں صاحبِ کمال ہے، اس کا کلام ، فیصلے ، وعدے اور شریعت حق ہیں ۔ قرآن مجید میں یہ نام 10 مرتبہ وارد ہوا ہے۔ ﴿فَتَعٰلَى اللّٰهُ الْمَلِكُ الْحَقُّ﴾چنانچہ اللہ تعالیٰ ہی بادشاہ اور حق ہے۔(طہ :114) 59، 60۔الوکیل الکفیل کارساز،ضامن اپنی تمام مخلوقات کے رزق اور تمام حاجات کا متولی و ضامن ہے اورجو اس کی پناہ چاہے اس کے لیے کافی ہے،اپنے اولیا کی مشکلوں کو آسان کرتا ہے،’’ الکفیل‘‘گواہ کے معنی میں ہے ، تاہم محافظ اور ضامن بھی کہا جاسکتاہے۔قرآن مجید میں اسم ’’الوکیل‘‘14 باراور’’الکفیل‘‘ایک بار آیا ہے۔ ﴿وَكَفٰى بِاللّٰهِ وَكِيْلًا ﴾اللہ ہی کافی کارساز ہے۔(النساء:81) ﴿ وَقَدْ جَعَلْتُمُ اللّٰهَ عَلَيْكُمْ كَفِيْلًا ﴾اور تم اللہ کو اپنا گواہ اور ضامن بنا چکے ہو۔(النحل:91) 61۔القوی قوی، زور آور جس کو مکمل قدرت اور طاقت حاصل ہے اس پر کوئی غالب نہیں آ سکتا اور جس کے فیصلے کو کوئی رد نہیں کر سکتا اس کے احکام اور فیصلے نافذ ہوتے ہیں ، وہ اپنے مؤمن بندوں کی مدد کرتا ہے نیز اپنی وحدانیت اور آیات کا انکار کرنے والوں کو کڑی سزا دیگا۔ قرآن مجید میں یہ نام ۹ مرتبہ آیا ہے۔ ﴿وَهُوَ الْقَوِيُّ الْعَزِيْزُ ﴾ وہ بڑی قوت والا اور زبردست ہے(الشوریٰ : 19)