اسماء الحسنیٰ(عثمان صفدر)

51۔الرقیب نگران ونگہبان ایسا نگہبان جس کا علم ہرشے پر محیط ہے، اس کی سماعت ہر سنی جانے والی چیز پر، اس کی بصارت ہر دیکھی جانے والی چیز پر حاوی ہے،اس سے کوئی بھی شے پوشیدہ نہیں رہ سکتی۔قرآن مجید میں یہ نام 3 بار آیا ہے۔ ﴿وَكَانَ اللّٰهُ عَلٰي كُلِّ شَيْءٍ رَّقِيْبًا ﴾اوراللہ ہر چیز پر نگراں ونگہبان ہے۔(الاحزاب:52) 52۔المجیب دعائیں قبول کرنے والا جودعاؤں کوقبول کرتا ہے ،مانگنے والوں کو عطاکرتا ہے۔قرآن میں یہ نام ایک بارآیا ہے۔ ﴿اِنَّ رَبِّيْ قَرِيْبٌ مُّجِيْبٌ ﴾مثال:بےشک میرا رب قریب اور دعائیں قبول کرنے والاہے ۔(ہود:61) 53۔الواسع وسعت والا وہ جس کی رحمت اور علم ہر چیز پر حاوی ہے، اور جس کا رزق اس کی تمام مخلوقات کے لئے کافی ہے، کوئی اس کی ثناء شمار نہیں کر سکتا۔ قرآن میں یہ نام 9 مرتبہ آیا ہے۔ ﴿ اِنَّ اللّٰهَ وَاسِعٌ عَلِيْمٌ ﴾ اللہ بڑی وسعت والا اور سب کچھ جاننے والا ہے۔ (البقرہ: 115) 54۔الحکیم بہت حکمت والا جس کی کمالِ حکمت تقدیروں ، احکامات ، اور قیامت کے دن کے فیصلوں میں موجود ہے۔ اسی نے ہر چیز عمدہ انداز سے پیدا کی، وہ کسی چیز کو بیکار و بے مقصد پیدا نہیں کرتا، اور نہ ہی حکمت سے عاری کوئی بھی شرعی حکم اور فیصلہ صادر فرماتا ہے۔ قرآن مجید میں یہ نام 91 مرتبہ آیا ہے۔ ﴿وَهُوَ الْعَزِيْزُ الْحَكِيْمُO﴾ اور وہ غالب اور حکمت والا ہے۔ (الجمعہ : 3) 55۔الودود بےحد محبت کرنےوالا وہ جو اپنےنبیوں ،رسولوں اور ان کی پیروی کرنےوالوں سے محبت کرتا ہے،اور وہ اس سے محبت کرتے ہیں ،وہ ایسا محبوب ہے کہ بندےکی اپنی جان، اولاد اورتمام محبوب چیزوں سے بڑھ کرمحبت کا حقدار ہے۔قرآن مجید میں اس لفظ کا ذکر2 مرتبہ ہوا ہے۔ ﴿اِنَّ رَبِّيْ رَحِيْمٌ وَّدُوْدٌ ﴾ بے شک میرا رب بے حد رحیم اور بہت زیادہ محبت کرنے والا ہے۔(ہود:90)