عصر حاضر میں اجتماعی اجتہاد جلد 2

اصحاب مالک رحمہ اللہ میں شمار کرتے تھے اور مذہب مالکی کے فقہاء میں شامل کرتے تھے۔ مؤطا امام مالک کے وہ حد درجہ ثنا خواں تھے۔ اس کی تحسین و حمایت میں وہ گرم تقریرکرتے تھے۔ فقہ اہل مدینہ کی ان کی نظر میں بڑی اہمیت تھی۔ وہ برابر اس کی مدافعت میں لگے رہتے اور اس کے پایہ بلند کی تحسین و توقیر کا اعتراف فرمایا کرتے۔ یہی وجہ تھی کہ جب امام محمد رحمہ اللہ اپنی مجلس سے اٹھ جاتے تو شافعی رحمہ اللہ ان کے اصحا ب سے مناظرہ کیا کرتے اور فقہ حجاز کی مدافعت زور شور سے کرتے اور ا س کے طریق تفقہ میں رطب اللسان رہتے البتہ خود امام محمد رحمہ اللہ سے اس معاملہ میں انہوں نے کبھی مناظرہ نہیں کیا۔ اس لیے کہ استاذ معظم کی جلالت شان اور عزت و منزلت بہر حال مدنظر تھی۔ ‘‘[1] شیخ أبو زہرہ رحمہ اللہ ایک اور جگہ لکھتے ہیں : ’’جب امام محمد رحمہ اللہ کو یہ خبر ملی کہ وہ ان کے اصحاب سے ان کی عدم موجودگی میں مناظرہ کیا کرتے ہیں تو ایک روز انہیں بلایا اور مناظرہ کی دعوت دی لیکن شافعی رحمہ اللہ کے لیے اس دعوت کا قبول کرنامشکل تھا۔ انہیں استاذ سے مناظرہ کرتے شرم آئی۔ لہذ اانکار کر دیا۔ لیکن امام محمد رحمہ اللہ برابر اصرار کرتے رہے کہ مسائل میں بحث و گفتگو اور تبادلہ خیال میں حرج ہی کیا ہے۔ آخر بڑی ناگواری کے ساتھ انہوں نے بحث چھیڑی۔ یہ مسئلہ تھا ’’شاہد و یمین کا‘‘۔ اس معاملے میں شافعی رحمہ اللہ کا مسلک اور نقطہ نظر امام محمد رحمہ اللہ سے مختلف تھا۔ شافعی راویوں کا بیان ہے کہ غلبہ شافعی رحمہ اللہ کو حاصل ہوا۔ ‘‘[2] امام أحمد بن حنبل رحمہ اللہ جن کا مزاج مناظرانہ نہ تھا‘ وہ بھی کئی ایک مسائل میں مناظرہ کرتے اور اپنے مخالف کو اس کی رائے سے رجو ع کرنے کے بارے میں سوچنے پر مجبور کر دیتے تھے۔ امام ذہبی رحمہ اللہ لکھتے ہیں : ’’ قال محمد بن أبی حاتم: قدم رجاء الحافظ فصار إلی أبی عبد اللّٰہ فقال لأبی عبد اللّٰہ ما أعددت لقدومی حین بلغک؟ وفی أی شیء نظرت ؟فقال: ما أحدثت نظرا ولم أستعد لذلک فإن أحببت أن تسأل عن شیء فافعل فجعل یناظرہ فی أشیاء فبقی رجاء لا یدری أین ھو۔ ‘‘[3] ’’محمد بن أبی حاتم رحمہ اللہ نے کہا: رجاء الحافظ أبوعبد اللہ(امام أحمد رحمہ اللہ)کے پا س آئے اور ان سے کہنے لگے: جب آپ نے میرے آنے کی خبر سنی تو کیا تیاری کی یا کس چیز میں آپ نے غور و فکر کیا؟ امام أحمد رحمہ اللہ نے کہا: نہ تو میں نے کوئی غور و فکر کیا اور نہ کسی مسئلے پر تیاری کی ہے۔ ہاں ! اگر آپ کچھ پوچھناچاہتے ہیں تو مجھ سے ضرور پوچھیں۔ پس امام أحمد رحمہ اللہ نے بعض مسائل میں رجاء الحافظ رحمہ اللہ سے مناظرہ شروع کر دیا یہاں تک کہ رجاء رحمہ اللہ کی حالت یہ ہو گئی کہ انہیں یہ معلوم نہیں تھا کہ وہ کہاں بیٹھے ہیں ؟(یعنی امام أحمد رحمہ اللہ کے علم سے حیران ہوتے ہوئے ان کے ہواس رخصت ہو گئے)۔ ‘‘ اسی طرح أبو نعیم أصبہانی رحمہ اللہ لکھتے ہیں : ’’ حدثنا الحسن بن سعید حدثنا زکریا الساجی حدثنا أبو العباس الساجی قال: سمعت أحمد بن حنبل ما لا أحصیہ فی المناظرۃ تجری بینی وبینہ وھو یقول: ھکذا قال أبو عبد اللّٰہ الشافعی۔ ‘‘[4] ’’ہمیں حسن بن سعید نے بیان کیا‘ انہوں نے کہا‘ ہمیں زکریا ساجی نے بیان کیا‘ انہوں نے کہا‘ ہمیں أبو العباس ساجی نے بیان کیا‘ انہوں نے کہا:میں نے امام احمد رحمہ اللہ سے اپنے اور ان کے مابین ہونے والے مناظروں میں بہت کچھ سنا اور ان مناظروں میں وہ اکثر وبیشتر کہتے تھے : اسی طرح شافعی رحمہ اللہ نے بھی کہا ہے۔ ‘‘ پس علمی مباحثہ و مکالمہ بھی اجتماعی رائے بنانے میں نافع ہے بشرطیکہ أذہان کسی متعین مذہبی یا گروہی تعصب سے آزاد ہوں۔

[1] آثار اما م شافعی رحمہ اللّٰہ : ص۶۷ [2] أیضاً:ص۶۷۔ ۶۸ [3] سیر أعلام النبلاء: ۱۲؍ ۴۱۳ [4] حلیۃ الأولیاء: ۹؍ ۹۹۔ ۱۰۰