ارکان ایمان ایک تعارف

(۱) اللہ تعالیٰ نے اپنی کتابیں اس لییٔ نازل فرمائیں تاکہ اس کے بندے اپنے تمام مسائل میں انہیںاپنا مرجع بنائیں ، اور ہر مسئلہ میں ان کی طرف رجوع کریں ، جیسا کہ اللہ تعالیٰ کا فرمان ہے : { فَإِنْ تَنَازَعْتُمْ فِیْ شَیْئٍ فَرُدُّوْہُ إِلَی اللّٰہِ وَالرَّسُوْلِ إِنْ کُنْتُمْ تُؤْمِنُوْنَ بِاللّٰہِ وَالْیَوْمِ الْاٰخِرِ ذٰلِکَ خَیْرٌ وَّأَحْسَنُ تَأْوِیْلاً } (سورۃالنسآء :۵۹) ’’ پھر اگر کسی معاملہ میں تمہارا اختلاف ہو جائے تو اسے اللہ اور رسول کی طرف لوٹا دو ، اگر تم اللہ اور یومِ آخرت پر ایمان رکھتے ہو ، اسی میں بھلائی ہے اور انجام کے اعتبار سے یہی اچھا ہے ۔‘‘ یہی وجہ ہے کہ عرفات میں خطبۂ حجۃ الوداع کے دوران رسول اللہ صلی اللہ علیہ وسلم نے اپنی امت کو تلقین فرمائی کہ وہ کتاب اللہ ( قرآن ِمجید ) کو مضبوطی سے تھام لے ، اس طرح وہ کبھی گمراہ نہیں ہوگی ، لہٰذا ہم پر لازم ہے کہ ہم قرآنِ مجید کو سیکھیں ، پڑھیں ، اس پر غور وفکر کریں اور اس پر عمل بھی کریں ۔ (۲) دوسری حکمت یہ ہے کہ لوگ ان کے ذریعے فیصلے کر سکیں ، جیسا کہ اللہ تعالیٰ کا فرمان ہے : { کَانَ النَّاسُ أُمَّۃً وَّاحِدَۃً فَبَعَثَ اللّٰہُ النَّبِیِّیْنَ مُبَشِّرِیْنَ وَمُنْذِرِیْنَ وَأَنْزَلَ مَعَہُمُ الْکِتٰبَ بِالْحَقِّ لِیَحْکُمَ بَیْنَ النَّاسِ فِیْمَا اخْتَلَفُوْا فِیْہِ } (سورۃ البقرۃ: ۲۱۳) ’’(در اصل )لوگ ایک ہی جماعت تھے پھر اللہ تعالیٰ نے نبیوں کو خوشخبریاں دینے اور ڈرانے والے بنا کر مبعوث فرمایا اور ان کے ساتھ سچی کتابیں نازل فرمائیں تاکہ لوگوں کے ہر اختلافی امر کا فیصلہ ہوجائے۔‘‘ اس آیتِ کریمہ کی روشنی میں ہم پر لازم ہے کہ ہم اپنے باہمی اختلافات کا فیصلہ قرآنِ مجید کے ذریعے کریں ، اور تمام متنازعہ امور میں کتاب اللہ کی طرف رجوع کریں ، اور کتاب اللہ جو فیصلہ کردے اس کے سامنے اپنے آپ کو جھکا دیں اور اسے کھلے دل سے تسلیم کر لیں ۔