عقیدہ فرقہ ناجیہ

اس لیئے آیت الکرسی پڑھنے کی بڑی فضیت وارد ہے ،چنانچہ جو شخص رات کو آیۃ الکرسی پڑھ کر سوئے ،اس پر شب بھر کیلئے اللہ تعالیٰ کی طرف سے ایک محافظ مقرر ہوجاتا ہے اور صبح تک شیطان بھی اس کے قریب نہیں پھٹکتا۔ عبارت کی تشریح …شرح… واضح ہو کہ آیت کا لغوی معنی علامت ہے ،جبکہ قرآنی اصطلاح میں آیت سے مراد ،قرآ نی کلمات پر مشتمل وہ حصہ یا ٹکڑا ،جو بذریعہ ’’فاصلہ‘‘ دیگر آیات سے جد ا اور متمیز ہو۔ مؤلف رحمہ اللہ نے جس سب سے بڑی آیت کا ذکر فرمایا ہے اس سے مراد آیۃ الکرسی ہے ، اس آیت کو آیت الکرسی اس لئے کہا جاتا ہے کہ اس میں (اللہ تعالیٰ کی) کرسی کا ذکر ہے۔ آیت الکرسی کے قرآنِ حکیم کی سب سے بڑی آیت ہونے کی د لیل ،ایک صحیح حدیث ہے جسے امام مسلم رحمہ اللہ نے ا پنی صحیح میں روایت فرمایا ہے۔ چنانچہ ابی بن کعب رضی اللہ عنہ سے مروی ہے ،رسول اللہ صلی اللہ علیہ وسلم نے سوال کیا قرآن کی سب سے بڑی آیت کونسی ہے ؟ انہوں نے عرض کیا :اللہ تعالیٰ اور اس کا رسول زیادہ جانتے ہیں ۔رسو ل اللہ صلی اللہ علیہ وسلم نے اپنا سوال بارباردھرایا ،تو ابی بن کعب رضی اللہ عنہ نے جواب دیا: سب سے بڑی آیت، آیۃالکرسی ہے، تب رسول اللہ صلی اللہ علیہ وسلم نے ارشاد فرمایا :اے ابو المنذر (ان کی کنیت ) تجھے شاندارعلم مبارک ہو۔ آیۃ الکرسی کے قرآن حکیم کی سب سے بڑی آیت ہونے کا سبب یہ ہے کہ یہ آیت اللہ تعالیٰ کے بہت سے اسماء وصفات پر مشتمل ہے، نیز بہت سی صفاتِ نقص جو اللہ تعالیٰ کی شان کے لائق نہیں سے اللہ تعالیٰ کی تنزیہ وتقدیس کو بھی محتوی ہے ،جس کی تفصیل درج ذیل ہے: اللہ تعالیٰ کے فرمان: ’’اللّٰه لَااِلٰہَ اِلاَّ ھُوَ ‘‘کا معنی یہ ہے کہ اللہ تعالیٰ کے سوا کوئی معبود برحق نہیں، چنانچہ معبود ِبرحق صرف اللہ تعالیٰ ہے اس کے سوا جتنے بھی معبود قائم کیئے گئے ہیں سب باطل ہیں جن کی عبادت سب سے بڑا با طل ہے۔