عقیدہ الاسلاف اور اصحاب الحدیث

کتاب: عقیدہ الاسلاف اور اصحاب الحدیث مصنف: ابو عثمان اسماعیل بن عبد الرحمنٰ الصابونی پبلیشر: سلفی ریسرچ انسیٹیوٹ ترجمہ: ابوصاریہ احسان یوسف الحسینوی مقدمہ نحمدہ ونصلي علی رسوله الکریم أشهد أن لا إله إلا اللّٰه وأشهد أن محمدا عبده ورسوله: أمابعد: اللہ کے فضل و کرم سے ’’عقیدۃ السلف و اصحاب الحدیث ‘‘ترجمہ ،تخریج و تحقیق اور مفید تعلیقات سے مزین پیش خدمت ہے ،امید کرتے ہیں کہ مسلمان اس کتاب سے نفع اٹھائیں گے اور دعا ہے کہ اللہ تعالیٰ اس کاوش کو قبول فرمائے یہ ایک چھوٹا سا عمل ہمارے ہاتھوں سے امر بالمعروف و نہی عن المنکر کے ضمن میں کر دے اور یہ بھی امید ہے کہ جو ہمارے بھائی تمنا اور حسرت رکھتے ہیں کہ وہ منہج سلف کے طریق پر گامزن ہوں ان کو اس کتاب کے ذریعے سے سلفی عقیدہ و منہج کی وضاحت ملے گی اور ان کی تشفی ہو گی ۔ان شاء اللہ ہمیں آپس میں اختلاف سے بچنے اور اتفاق و اتحاد کو قائم کرنے کا حکم دیا گیا ہے الحمدللہ آج بھی قرآن و حدیث کی دعوت اس واضح راستے کو بیان کرتی ہے ،اور تمام اختلاف کا حل قرآن و حدیث ہے یہی ایک کسوٹی ہے اسی پر تمام لوگوں کا اتفاق ممکن ہے اور یہی ہماری دعوت ہے ۔