عقیدہ اہل سنت والجماعت(شرح عقیدہ واسطیہ)

شفاعت۔ چناں چہ وہ کم آگ والی دوزخ میں ہوگا۔ جیسا کہ احادیث میں اس کا ذکر آتا ہے۔[1] تیسری شفاعت: یہ جہنم کے مستحق لوگوں کے لیے ہو گی۔ معتزلہ اور خوارج اس شفاعت کے منکر ہیں ، ان کا مذہب یہ ہے کہ جو بھی جہنم کا مستحق ہے اس میں داخل ہو کر رہے گا اور جو داخل ہو گا وہ کبھی اس میں سے نکل نہ سکے گا۔ نہ شفاعت سے، نہ کسی اور ذریعے سے۔ جب کہ متواتر احادیث ان کے باطل عقیدہ کے خلاف ہیں ۔[2] _________________________________________________ اصل متن :… وأصناف ما تضمنتہ الدار الآخرۃ من الحساب والثواب والعقاب والجنۃ والنار وتفاصیل ذلک مذکورۃ فی الکتب المنزلۃ من السماء والآثار من العلم المأثور عن الأنبیاء۔ وفی العلم الموروث عن محمد صلی اللّٰه علیہ وسلم من ذلک ما یشفی ویکفی فمن ابتغاہ وجدہ۔ اور دار آخرت جن باتوں کو شامل ہے جیسے حساب کتاب، ثواب عقاب، جنت دوزخ اور ان کی تفاصیل کہ یہ سب باتیں آسمانی کتابوں اور انبیاء کرام سے منقول اقوال و آثار میں مذکورہ ہیں اور (ان امور کی بابت) نبی کریم صلی اللہ علیہ وسلم سے مروی علم اس قدر ہے کہ جو (ہر قسم کے شکوک و شبہات سے) شفا بخشتا ہے اور جو ان کا متلاشی ہو وہ انہیں (علوم نبوت میں ) پا سکتا ہے۔ _________________________________________________ شرح:… عالم آخرت کا نقلی و عقلی ثبوت: جان لیجیے کہ اچھے اور برے اعمال پر جزا و سزا کا قانون جہاں سمع سے ثابت ہے وہیں عقل سے بھی ثابت ہے۔رب تعالیٰ نے قرآن کریم میں متعدد مقامات پر انسانی عقول کو اس بات کی طرف متوجہ کیاہے۔ چناں چہ ارشاد ہے: ﴿اَفَحَسِبْتُمْ اَنَّمَا خَلَقْنَاکُمْ عَبَثًا وَّاَنَّکُمْ اِِلَیْنَا لَا تُرْجَعُوْنَ﴾(المومنون: ۱۱۵) ’’کیا تم یہ خیال کرتے ہو کہ ہم نے تم کو بے فائدہ پیدا کیا ہے اور یہ کہ تم ہماری طرف لوٹ کر نہیں آؤ گے۔‘‘

[1] بخاری: کتاب مناقب الانصار باب قصۃ ابی طالب۔ حدیث رقم: ۳۸۸۳۔ [2] بخاری: کتاب الرقاق باب صفۃ الجنۃ والنار۔ حدیث رقم: ۶۵۵۸۔