عقیدہ اہل سنت والجماعت(شرح عقیدہ واسطیہ)

٭ رب تعالیٰ نے اپنی رؤیت کو اس بات کے ساتھ معلق کیا کہ تجلی کی حالت میں پہاڑ اگر اپنی حالت پر باقی رہتا ہے تو تم بھی زیارت کر لو گے۔ اور استقرارِ جبل ممکن ہے اور جو چیز ممکن کے ساتھ معلق ہو وہ ممکن ہوتی ہے (لہٰذا رویت کا استقرارِ جبل کے ساتھ معلق کرنا اس بات کی دلیل ہے کہ رؤیت ممکن ہے۔) ٭ پھر رب تعالیٰ نے بالفعل پہاڑ پر جو کہ جمادات میں سے ہے اپنی تجلی ڈالی تو (جب جمادات پر تجلی ڈالنا ثابت ہے تو پھر) اپنے محبوبوں اور برگزیدہ بندوں کے لیے یہ تجلی ڈالنا ممتنع نہ رہا۔ معتزلہ کا ایک نحوی استدلال اور اس کا جواب: معتزلہ نے ایک دلیل یہ بیان کی ہے کہ رب تعالیٰ نے ’’لن ترانی‘‘ فرمایا ہے جس میں لفظ ’’لن‘‘ حرفِ ناصبہ ہے جو مستقبل میں ابدالآباد کی نفی کے لیے آتا ہے، جو اس بات پر دلالت کر رہا ہے کہ یہ رؤیت کبھی واقع نہیں ہو سکتی مگر یہ ان لوگوں کی لغت عربیہ کے بارے میں کذب بیانی (اور یا وہ گوئی) ہے (کہ لفظ ’’لن‘‘ ابدالآباد کی نفی کے لیے آتا ہے) مثلاً اس آیت کو ہی دیکھ لیجیے جس میں یہ ذکر ہے کہ کفار موت کی تمنا ہرگز نہ کریں گے۔ چناں چہ فرمایا: ﴿وَ لَنْ یَّتَمَنَّوْہُ اَبَدً ا﴾ (البقرۃ: ۹۵) ’’مگر یہ (اپنے اعمال کی بنا پر جو وہ آگے بھیج چکے ہیں ) کبھی موت کی تمنا نہ کریں گے۔‘‘ ﴿وَنَادَوْا یَامَالِکُ لِیَقْضِ عَلَیْنَا رَبُّکَ﴾ (الزخرف: ۷۷) ’’اور پکاریں گے، اے (دوزخ کے داروغہ) مالک! تمہارے رب ہمیں موت دے دے۔‘‘ پہلے رب تعالیٰ نے لفظ ’’لن‘‘ کے ساتھ (جو بزعم معتزلہ ابدالآباد کی نفی کے لیے آتا ہے) اس بات کی خبر دی کہ کفار موت کی تمنا نہ کریں گے پھر ساتھ ہی (سورۂ زخرف میں ) یہ بھی بتلا دیا کہ وہ دوزخ میں (اس کی آفات و بلیات کو دیکھ کر) موت کی تمنا کریں گے۔ (چناں چہ اگر ’’لن‘‘ دائمی نفی کے لیے ہوتا تو کفار کا دوزخ میں موت کی تمنا کرنا کبھی ثابت نہ ہوتا۔ اس تفصیل کے بعد اب ’’لن ترانی‘‘ کا معنی یہ بنتا ہے کہ ’’(اے موسیٰ!) دنیا میں رؤیت باری تعالیٰ بشر کے کمزور ہونے کی بنا پر تم اس دنیا میں میری رؤیت نہیں کر سکتے۔‘‘ اور اگر رؤیت باری تعالیٰ بالذات ممتنع ہوتی تو رب تعالیٰ (لن ترانی فرمانے کی بجائے) ’’لا اُرَی‘‘ فرماتے، یعنی مجھے دیکھا ہی نہیں جا سکتا۔ یا میں ایسا نہیں کہ جو دیکھا جا سکے وغیرہ وغیرہ۔ واللہ اعلم۔