عقیدہ اہل سنت والجماعت(شرح عقیدہ واسطیہ)

’’الارائک‘‘ یہ ’’اریکۃ‘‘ کی جمع ہے جس کا معنی ’’سریر‘‘ (تخت، چارپائی) اور آراستہ تکیہ دار چوکی ہے۔ اہل ایمان کا جنت میں اللہ کی طرف دیکھنا ایک زائد انعام اور نعمت ہے: سورۂ یونس اور ق کی مذکورہ دونوں آیتوں میں ’’زیادتی‘‘ کی تفسیر ایک صحیح حدیث کے مطابق رب تعالیٰ کے چہرہ کی طرف دیکھنے سے ہے۔ اور خود قرآن کریم سے بھی اس بات کی تائید اس آیت سے ہوتی ہے جو کفار کے حق میں ہے، ارشاد ہے: ﴿کَلَّآ اِِنَّہُمْ عَنْ رَبِّہِمْ یَوْمَئِذٍ لَّمَحْجُوبُوْنَ﴾ (المطففین: ۱۵) ’’بے شک یہ لوگ اپنے پروردگار (کے دیدار) سے اوٹ میں ہوں گے۔‘‘ کفار کا رب تعالیٰ کے دیدار سے اوٹ میں ہونا اس بات کی دلیل ہے کہ مومنین اور اولیاء اس کو دیکھیں گے۔ اور حضرات محدثین کے نزدیک روایت کے متعلقہ وارد احادیث ’’تواتر معنوی‘‘ کی حد کو پہنچی ہوئی ہیں جن سے ملحدوں اور زندیقوں کے سوا کسی کو انکار نہیں ۔ معتزلہ کے دلائل کا تفصیلی رد: معتزلہ نے رؤیت کی نفی میں دلائل نقلیہ میں سے ’’لا تدرکہ الابصار‘‘ والی آیت پیش کی ہے، مگر یہ آیت ان کے لیے دلیل نہیں بن سکتی کیوں کہ آیت میں ’’ادراک‘‘ کی نفی ہے جو رؤیت کی نفی کو مستلزم نہیں ۔ مراد آیت یہ ہے کہ نگاہیں اس کو دیکھیں گی مگر ان کی رؤیت اس کی ذات کا ادراک احاطہ نہ کر سکیں گی۔ جیسے عقلیں اس کے وجود سے باخبر ہیں مگر ان کا علم ذات الٰہی کا احاطہ نہیں کر سکتا کیوں کہ ’’ادراک‘‘ اس رؤیت کو کہتے ہیں جس میں احاطہ ہو اور یہ ’’رؤیت خاصہ‘‘ ہے اور (آیت مذکورہ میں اس رؤیت خاصہ کی نفی ہے اور قاعدہ مسلم ہے کہ خاص کی نفی مطلق کی نفی کو مستلزم نہیں ہوتی لہٰذا یہاں بھی) رؤیت خاصہ کی نفی رؤیت مطلقہ کی نفی کو مستلزم نہ ہوگی۔ معتزلہ نے اپنے نظریہ پر دوسرا استدلال اس آیت سے کیا ہے ’’لن ترانی‘‘ جو رب تعالیٰ سیدنا موسیٰ علیہ السلام سے فرما رہے ہیں ۔ یہ آیت بھی ان کی دلیل نہیں بن سکتی بلکہ یہ آیت تو کئی اعتبار سے رؤیت پر دلالت کرتی ہے۔ جیسے ٭ سیدنا موسیٰ علیہ السلام کا رب تعالیٰ سے سوال کرنا کہ وہ اسے دیکھنا چاہتے ہیں ۔ یہ موسیٰ کلیم اللہ ہیں جو ان معتزلہ سے زیادہ اس بات کو جانتے ہیں کہ باری تعالیٰ کے حق میں کون سی بات مستحیل ہے (اور کون سی غیر مستحیل) چناں چہ اگر رؤیت باری تعالیٰ ممتنع ہوتی تو وہ ہرگز اس کا سوال نہ کرتے۔