عقیدہ اہل سنت والجماعت(شرح عقیدہ واسطیہ)

﴿لَنْ تَرٰنِیْ وَ لٰکِنِ انْظُرْ اِلَی الْجَبَلِ فَاِنِ اسْتَقَرَّ مَکَانَہٗ فَسَوْفَ تَرٰنِیْ﴾ (الاعراف: ۱۴۳) ’’تم مجھے ہرگز نہ دیکھ سکو گے ہاں پہاڑ کی طرف دیکھتے رہو، اگر یہ اپنی جگہ قائم رہا تو تم مجھ کو دیکھ سکو گے۔‘‘ معتزلہ کے قدرے قدم بقدم اشاعرہ: اگرچہ جہت کی نفی کرنے میں اشاعرہ معتزلہ کے شانہ بشانہ ہیں مگر وہ رؤیت کو ثابت کرتے ہیں ، اسی لیے رؤیت کی تفسیر بیان کرنے میں یہ (معتزلہ سے زیادہ) گم گشتہ راہ اور حیران و پریشان ہیں ، اس لیے کوئی تو ان میں سے یہ کہتا ہے کہ اہل ایمان اللہ کو ہر جہت سے دیکھیں گے، کسی کے نزدیک یہ رؤیت بصر (یعنی آنکھ) کے ساتھ نہیں بلکہ بصیرت (یعنی علم اور نور قلب) کے ساتھ ہے اور وہ کہتا ہے کہ اس سے مراد انکشاف اور تجلی کی زیادتی ہے یہاں تک کہ گویا کہ وہ آنکھ کی رؤیت کی طرح ہوگی۔ علامہ رحمہ اللہ نے ان آیات کو لا کر نفی رؤیت کے عقیدہ میں معتزلہ پر حجت قائم کر دی ہے کیوں کہ پہلی آیت میں ’’النظر‘‘ مادہ کو ’’الٰی‘‘ حرفِ جر کے ساتھ متعدی کیا گیا ہے اور اس صورت میں ’’النظر‘‘ ’’الابصار‘‘ (نگاہ ڈال کر اور آنکھ کے ذریعے دیکھنے) کے معنی میں ہوگا۔ چناں چہ کہا جاتا ہے ’’نَظَرْتُ اِلَیْہِ‘‘ اور ’’اَبْصَرْتُہُ‘‘ کہ ان دونوں جملوں کا معنی ایک ہے اور وہ ہر نگاہ ڈال کر دیکھنا۔ اور (مذکورہ آیت میں ) نظر کا متعلق رب تعالیٰ کی ذات ہے (تو مطلب یہ ہوا کہ روز قیامت جنت میں اہل ایمان رب تعالیٰ کو نگاہ ڈال کر دیکھیں گے ناکہ نورِ قلب اور فہم و فراست اور حس ذکاوت سے اس کی ذات کا اور اس کی تجلیات و انوارات سے اس کے وجود کا ادراک کریں گے کہ یہ خوبی تو اہل ایمان کو اس دنیا میں بھی میسر ہے۔ ) معتزلہ کے تکلّفات باردہ: معتزلہ نے جو ’’ناظرہ‘‘ کو ’’منتظرہ‘‘ کے معنی میں اور ’’الی ربھا‘‘ کو ’’الی نعمۃ ربھا‘‘ کے معنی میں لینے کا تکلف بارادہ کیا ہے یعنی ’’اس دن وہ رونق دار چہرے اپنے رب کے ثواب کے منتظر ہوں گے۔ یقینا یہ ایک مضحکہ خیز تاویل ہے۔ جنت کے تختوں پر بیٹھ کر رب تعالیٰ کی زیارت کے مزے: ’’علی الارائک ینظرون‘‘ یہ آیت اس بات کا فائدہ دیتی ہے کہ اہل جنت جنت میں اپنے تختوں پر بیٹھے رب تعالیٰ کی زیارت کریں گے اور اس کی طرف دیکھتے ہوں گے۔