عقیدہ اہل سنت والجماعت(شرح عقیدہ واسطیہ)

معرض، گڑھے یا جوہڑ کو ’’البِرکۃ‘‘ کہتے ہیں کیوں کہ اس میں پانی ٹھہرا رہتا ہے مگر ’’البَرکہ‘‘ کی یہ توجیہ بعیداز احتمال ہے۔ فرقان تنزیل، عبد اور عالمین کی مراد اور تشریح: فرقان سے مراد قرآن ہے اور قرآن کا نام فرقان اس لیے رکھا گیا کیوں کہ قرآن میں حق کو باطل سے اور ہدایت کو گمراہی سے جدا کرنے کی قوت ہے اور قرآن اتارنے کو ’’نَزَّلَ‘‘ (باب تفعیل سے) تشدید کے ساتھ اس لیے تعبیر کیا تاکہ قرآن کے تدریجی نزول کو بتلایا جا سکے کہ قرآن ’’دفعۃً واحدۃً ‘‘ (یکبارگی) نہیں اترا (بلکہ تھوڑا تھوڑا وقتاً فوقتاً رب تعالیٰ کی حکمت کے مطابق اترتا رہا ہے، جس میں بندوں کی مصالح کو ملحوظ رکھا گیا۔) ’’عَبْدِہٖ‘‘ سے مراد جناب رسول اللہ حضرت محمد صلی اللہ علیہ وسلم ہیں اور آپ صلی اللہ علیہ وسلم کو ’’بندے‘‘ کے لقب سے ملقب کرنے میں آپ صلی اللہ علیہ وسلم کی عزت افزائی اور بزرگی کو بتلانا مقصود ہے جس کی تفصیل گزر چکی ہے۔ ’’عالمین‘‘ یہ ’’عالَم‘‘ کی جمع ہے اور یہ ذوی العقول کے لیے آنے والے جمع کے وزن پر جمع کا صیغہ ہے اس کی مراد میں علماء کا اختلاف ہے، ایک قول انسان کا اور ایک قول انسان اور جن دونوں کا ہے اور یہی صحیح ہے۔ نبی کریم صلی اللہ علیہ وسلم جنوں کی طرف بھی پیغمبر بنا کر بھیجے گئے ہیں : (قرآن و حدیث کی صریح نصوص سے) یہ بات ثابت ہے کہ آپ صلی اللہ علیہ وسلم کو جنوں کی طرف بھی پیغمبر بنا کر بھیجا گیا اور یہ کہ آپ صلی اللہ علیہ وسلم جنوں کو اکٹھا فرما کر انہیں قرآن سنایا کرتے تھے اور جنوں کی ایک جماعت جب آپ صلی اللہ علیہ وسلم کے پاس سے گزری اور اس نے قرآن کو سنا تو وہ اسلام لے آئی اور انہوں نے جا کر اپنی قوم کو بھی ڈرایا۔ چناں چہ ارشاد ہے: ﴿وَاِِذْ صَرَفْنَآ اِِلَیْکَ نَفَرًا مِّنَ الْجِنِّ یَسْتَمِعُوْنَ الْقُرْاٰنَ فَلَمَّا حَضَرُوْہُ قَالُوْا اَنْصِتُوا فَلَمَّا قُضِیَ وَلَّوْا اِِلٰی قَوْمِہِمْ مُنْذِرِیْنَ﴾(الاحقاف: ۲۹) ’’اور جب ہم نے جنوں میں سے کئی شخص تمھاری طرف متوجہ کیے کہ قرآن سنیں ، تو جب وہ اس کے پاس آئے تو (آپس میں ) کہنے لگے: ’’خاموش رہو‘‘ جب (پڑھنا) تمام ہوا تو اپنی برادری کے لوگوں میں واپس گئے کہ ان کو نصیحت کریں ۔‘‘