عقیدہ اہل سنت والجماعت(شرح عقیدہ واسطیہ)

شرح:… رب تعالیٰ کی صفت سمع، بصر اور رویت کا بیان: یہ (ساتوں ) آیات جن کو علامہ رحمہ اللہ نے ذکر کیا ہے، رب تعالیٰ کے لیے صفت سمع، بصر اور رؤیت کے اثبات کو متضمن ہیں ۔ مادۂ ’’سَمِعَ‘‘ کے جملہ اشتفاقات کو آیات میں ذکر کیا گیا ہے۔ جیسے سَمِعَ، یَسْمَعُ،سَمِیْعٌ، نَسْمَعُ اور اَسْمَعُ۔ یہ رب تعالیٰ کی حقیقی صفت ہے جس کے ذریعے وہ سب آوازوں کو سنتا ہے، اس کی تفصیل گزشتہ میں بیان ہو چکی ہے۔ ’’بصر‘‘ رب تعالیٰ کی وہ صفت ہے جس کے ذریعے وہ ذاتوں اور رنگوں کا ادراک کرتا ہے اور (اس معنی کے لحاظ سے) رؤیت ’’بصر‘‘ کو لازم ہے۔ان دونوں صفات کا ذکر حضرت ابو موسیٰ رضی اللہ عنہ اشعری کی اس حدیث میں آتا ہے کہ ’’اے لوگو! ذرا تحمل سے کام لو، تم کسی بہرے اور غیر موجود کو نہیں پکارتے بلکہ تم ایک سننے والے دیکھنے والے کو پکارتے ہو، بے شک تم جس ذات کو پکارتے ہو وہ تمھاری سواری (اونٹنی) کی گردن سے بھی زیادہ تمہارے قریب ہے۔‘‘[1] بت کریں آرزو اللہی کی شان ہے تیری کبریائی کی: سمع و بصر کسی ذات کے کمال کی دلیل ہیں اسی لیے رب تعالیٰ نے مشرکوں کو اس بات کا عار دلایا کہ تم ان کی عبادت کرتے ہو جو سننے اور دیکھنے کی صفت کمال سے بے بہرہ اور بے نصیب ہیں ۔ مذکورہ آیات کی اجمالی تفسیر: پہلی آیت: پہلی آیت خولہ بنت ثعلبہ کے بارے میں نازل ہوئی جب ان کے خاوند نے ان سے ظہار[2] کر لیا تو وہ نبی کریم صلی اللہ علیہ وسلم کی خدمت میں خاوند کی شکایت لے کر آئی اور گفتگو کرنے لگی (کہ یہ میرے خاوند نے مجھے کہہ دیا اور کیا اب میں اس کی بیوی باقی ہوں ) جب کہ نبی کریم صلی اللہ علیہ وسلم اسے یہ فرما رہے تھے ’’میرا خیال ہے کہ تم اس پر حرام ہو چکی ہو۔‘‘ (اس پر یہ آیت نازل ہوئی۔)

[1] البخاری، باب الدعا، حدیث رقم: ۶۳۸۴۔ [2] ظہار: اپنی بیوی یا اس کے کسی عام بدن کے حصے کو اپنی حقیقی، نسبتی یا رضاعی محرم عورتوں میں سے کسی کے ایسے عضو سے تشبیہ دینا جس کی طرف دیکھنا حرام ہے۔ اس کو شرع شریف کی اصطلاح میں ظہار کہتے ہیں جیسے بیوی کو کہنا: ’’تو میرے لیے میری ماں کی پیٹھ کی طرح ہے۔‘‘ (القاموس الوحید، ص: ۱۰۳۵، بتصرفٍ و زیادۃٍ)