علامہ ابن باز یادوں کے سفر میں

میں نے یہ واقعہ اس لیے بھی بیان کیا ہے کہ تقریباً ہر آدمی کو ایسے موڑ سے لامحالہ گزرنا پڑتا ہے، اگر ایسا موقع آ ہی جائے تو آدمی کو گھبرانے کے بجائے حکمت عملی کے ساتھ کام کرنا چاہیے۔ کسی کی دھمکی سے کچھ نہیں ہوتا۔ ہر آدمی اپنی قسمت کا لکھا ہوا پا کر رہتا ہے؛ خواہ دھمکی دینے والا خود کو کچھ بھی سمجھ بیٹھے!! غرض آٹھ ماہ تک اس دکان میں ڈیوٹی کرتا رہا اور اللہ تعالیٰ سے دعا کرتا رہا کہ مجھے اس کام سے نجات دے اور علمی کام میں جگہ عنایت فرمائے۔ بالآخر میری دعا قبول ہوئی اور میں آٹھ ماہ بعد ’’علامہ ابن باز اسلامک اسٹڈیز سنٹر‘‘ میں منتقل ہو گیا۔ اس ریسرچ سنٹر میں میں نے علمی کام کرنے کا سلیقہ سیکھا اور خوب خوب استفادہ کیا۔ کئی ایک کتابوں پر کام کرنے کا موقع ملا۔ چونکہ میں کاتب بھی تھا اس لیے مجھے قرآن کی تفسیر ’’تیسیر الرحمن لبیان القرآن‘‘ کے مراجعہ کے علاوہ اس کی آیات کی پیسٹنگ کا موقع بھی ملا جو یقینا میرے لیے قابلِ فخر بات ہے۔ غرض جون 1999ء سے 2003ء تک اس ادارے میں علمی کام کرتا رہا۔ اس کے بعد وہاں سے میرا ٹرانسفر ہو گیا۔ اور میں نے مورخہ11اکتوبر 2003ء سے جنوری 2008ء تک مکتبہ دار السلام ریاض میں ترجمہ وتالیف کا کام انجام دیا۔ اس کے بعد سعودی عرب کے سپریم کورٹ کے وکیلوں کے ایک گروپ کے ساتھ بحث وتحقیق اور ترجمہ وتالیف کا کام کیا اور آج تک اسی کام میں ہوں۔ ایک یادگار دن: انسانی زندگی میں بے شمار تجربے سامنے آتے ہیں۔ مجھے وہ دن یاد ہے جب مجھے علامہ ابن باز اسلامک اسٹڈیز سنٹر ریاض سے ٹرانسفر ہونے کا آرڈر ملا تھا۔ چونکہ میں کمپیوٹر وغیرہ کا علم نہیں رکھتا تھا اور نہ ہی میرے پاس کوئی حرفت تھی۔ چنانچہ میرے چند ساتھی میرے بارے میں بات کرنے لگے کہ رضوان کے ساتھ جتنے لوگوں کو بھی ٹرانسفر کا لیٹر ملا ہے انھیں کمپیوٹر کا علم ہے، اس لیے انھیں سروس ملنے میں کوئی دشواری پیش نہیں آئے گی؛ البتہ رضوان کے بارے